Xitayning jenubiy ölkiliride yuqumluq késellerning aldini élish kücheytildi

Sherqiy jenubiy asiyada qush zukimi wirosi qaytidin tarqilip, 41 ademning ölishini keltürüp chiqarghandin kiyin, xitayning jenubidiki bir qisim ölkiler sars we qush zukimi qatarliq yuqumluq kisellerdin mudapi'e körüsh tedbirlirini kücheytken.

Fransiye axbarat agéntliqining xewirige qarighanda, gu'angdung ölkisidiki sehiye da'iriliri, gu'angdungdiki her qaysi doxturxanilarda mexsus qizitma késelliri bölimini tesis qilghan hemde sars we qush zukimi alametliri körülgen bimarlarni derhal ayrip, 12 sa'et ichide mutexessislerning diyagnoz quyushigha apirishni telep qilghan. Buningdin sirt, ular yene sars we qush zukimi asan tarqilidighan qozan we öy qushlirini küzitishke bashlighan.

Gu'angdungdiki sehiye xadimliri nawada bu yil sars késili qayta tarqalsa, özlirining yiterlik teyyarliq körgenlikini bildürgen. Aldinqi yili qishta gu'angdungdin tarqalghan sars késili sewebidin dunyada 800 dek adem ölüp, sekkiz mingdin köp adem aghrighan idi. Yéqindin boyan tayland we wéynamda qush zukimining qaytidin tarqilishi bilen dunya sehiye teshkilati qush zukimining keng kölemde tarqilip, dunya miqyasida yette milyon kishining ölishini keltürüp chiqirishi mumkinliki heqqide agahlandurdi.

Xitayning jenubiydiki ölkiler yuqumluq kisellerdin mudapi'e körüsh tedbirlirini kücheytken bilen, Uyghur élining bu heqte tedbir alghanliqi heqqide téxi héchqandaq xewer bérilmidi.(Arzu)