Béyjing hökümiti xungkongdiki parlamént saylimigha arilashqanliqi üchün tenqidlendi

"Xelq'ara kishilik hoquqni közitish teshkilati" peyshenbe küni doklat élan qilip, xitay hökümitini " yekshenbe küni xongkongda ötküzülidighan parlamént saylimi harpisida, xongkongda térrorchiliq keypiyatini shekillendürdi" dep tenqid qildi.

Yekshenbe küni,xongkong parlaméntida bosh qalghan 30 orunni toldurush üchün saylam élip bérilidu. " Xelq'ara kishilik hoquqni közitish teshkilati " doklatida, xitay hökümitining saylam harpisida xongkongdiki metbu'atlar, kandidatlar we saylighuchilargha her xil tehdit wastilirini qollinip, démokratchilar namzatlirining saylinishini tosushqa uruniwatqanliqini bildürdi.

" Xelq'ara kishilik hoquqni közitish teshkilati" yene xitayning 1997 - yili xongkongni qayturiwalghanda ,xongkonggha aliy aptonomiye bérish heqqide bergen wedilirige xilapliq qiliwatqanliqini qattiq eyiblidi.

Xitay tashqi ishlar ministirliki bolsa, mezkur doklatqa derhal inkas qayturup, "chet'el teshkilatlirining xongkongning ishlirigha arilishishining hajiti yoq " dep körsetti hemde xongkonggha aliy aptonomiye bergenlikini tekitlidi.

Xongkongning xitayperes hökümitimu, bu doklatni "heqiqetni burmilighan" dep körsetti. Xongkong parlamént saylimigha qatnishidighan démokratik namzatlar bolsa, saylam xelqini béyjing hökümitining dépigha usul oynimasliqqa chaqirdi. Yekshenbe künidiki saylam, xongkong tarixidiki riqabiti eng küchlük bir saylam bolidighanliqi perez qilinmaqta. (Arzu)