خوڭكوڭدا پارلامېنت سايلىمى ئۆتكۈزۈلدى

خوڭكوڭنىڭ ئىگىلىك ھوقۇقى خىتايغا قايتۇرۇپ بېرىلگەندىن كېيىنكى خوڭكوڭ قانۇن چىقىرىش پالاتاسىنىڭ 3 - قېتىملىق ۋەكىللەر سايلىمى يەكشەنبە كۈنى ئۆتكۈزۈلدى. خەلقئارا مەتبۇئاتلار ، بۇ يىلقى سايلامدىكى بىلەت تاشلىغۇچىلارنىڭ ئومۇمىي سانى ئالدىنقى قېتىمقى سايلامغا قاتناشقۇچىلارنىڭ سانىدىن كۆپ يۇقىرىلىقىنى ئىلگىرى سۈرمەكتە.

كۈزەتكۈچىلەر ، بىلەت تاشلىغۇچىلار سانىنىڭ كۆپلىكى خوڭكوڭدىكى دېموكراتىك كۈچلەر بىلەن بېيجىڭ مەركىزى ھۆكۈمىتى ئوتتۇرىسىدىكى ئىختىلاپ بىلەن مۇناسىۋەتلىك بولىشى مۇمكىن دەپ قارىغان . سايلام نەتىجىسى تېخى ئېلان قىلىنمىغان بولسىمۇ بىراق ، دېموكراتىك كۈچلەر قانۇن چىقىرىش پالاتاسىدىكى% 60 ئورۇنغا ئىگە بولۇشنى ئۈمىد قىلماقتا .

بۇ قېتىمقى سايلامدا خوڭكوڭ بويىچە ئاۋاز بېرىش سالاھىيىتىگە ئىگە 3 مىليون 200 مىڭ ئادەم بىلەت تاشلايدۇ . سايلامنىڭ نەتىجىسى دۈشەنبە كۈنى ئەتىگەندە ئېلان قىلىنىشى مۇمكىن . بۇ قېتىمقى سايلام خوڭكوڭ قانۇن چىقىرىش پالاتاسىنىڭ 60 نەپەر ۋەكىلىنى سايلاپ چىقىلىدۇ . 60 ۋەكىلنىڭ 30 نەپىرى بىۋاسىتە سايلام ئارقىلىق سايلىنىدۇ ، قالغان 30 نەپىرى ھەر قايسى سىياسى گۇرۇھلارنىڭ سايلامدا ئېرىشكەن بىلىتىگە قاراپ تەقسىم قىلىنىدۇ . بۇ قېتىمقى سايلام خوڭكوڭ تارىخىدىكى رىقابەت ئەڭ كەسكىن سايلام بولدى . خوڭكوڭ مەتبۇئاتلىرى بۇ قېتىمقى سايلامنى خوڭكوڭدىكى دېموكراتىك كۈچلەر بىلەن بېيجىڭپەرەس كۈچلەر ئوتتۇرىسىدىكى ئېلىشىش دەپ باھا بەرمەكتە . سايلام نەتىجىسى خوڭكوڭنىڭ كېلەركى 4 يىللىق سىياسى ئىستىقبالىغا تەسىر كۆرسىتىشى مۇمكىن . (ئەركىن)