Тәйвән парламент сайлиминиң нәтиҗиси елан қилинди


2004.12.12

Тәйвәндики парламент әзалириниң сайлими шәнбә күни аяқлашти. Өктичи гоминдаң, чинмиңдаң вә шиндаң гуруһидикиләр, тәйвән парламентидики 225 орунниң 116 сигә еришип, тәйвән парламентида көп санлиқни игилиди.

Мустәқиллиқни яқлайдиған, һакимийәттики тәйвән демократийә тәрәққият партийиси билән тәйвән бирләшмә партийиси гороһидикиләр парламентта 101 орунға еришти.

Әнглийә б б с радио- телевизийисиниң хәвиригә қариғанда, мәзкур сайламниң нәтиҗиси тәйвәнниң сияситидә йеңи вәзийәтни кәлтүрүп чиқириши мумкин. Чүнки өктичи партийә гуруһидикиләр бейҗиң билән мунасивәтни күчәйтишни тәшәббус қилиду.

Тәйвән президенти чин шүйбйән парламент сайлимида өз гуруһидикилириниң мәғлуп болуш мәсулийитини өз үстигә елип, һәр қайси партийә - гуруһларни бирликтә тәйвәнниң тәрәққиятини илгири сүрүшкә чақирған. Бәзи күзәткүчиләр, сайлам нәтиҗисиниң, чин шүйбйәнниң тәйвәнни хитай чоң қуруқлиқидин айриш тиришчанлиқиға берилгән бир чоң зәрбә икәнликини билдүрмәктә.

Бу қетимқи тәйвән парламент әзалириниң сайлимида 386 кандидат сайламда бивастә мәйданға келидиған 175 орунни талашқан. Қалған 49 орун болса, һәр қайси партийә - гуруһларниң авазға еришиш нисбитиниң юқири - төвәнликигә қарап тәқсим қилинған. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.