Сәуди падишаһи абдулла хитайдики зияритини ахирлаштурди


2006.01.24

Сәуди әрәбистан падишаһи абдулла хитайға қилған тарихий характерлик зиярити җәрянида, бейҗиң даирилири билән енергийә һәмкарлиқ келишими имзалиғандин кейин, сәйшәнбә күни зияритини ахирлаштуруп бейҗиңдин айрилди.

Падишаһ абдулла сәйшәнбә күни хитай баш министири вен җябав билән көрүшкәндин кейин, бейҗиңдин айрилип һиндистанға йүрүп кәткән. Франсийә ахбарат агентлиқиниң хәвәр қилишичә, абдулла вен җябавға сәуди әрәбистан хитайни " һәқиқи дост дөләт" дәп қарайду дәп тәкитлигән вә хитай - сәуди мунасвитиниң сияси , иқтисади сәһәләрдә " техиму яхши" болуп кетишини үмид қилған.

Падишаһ абдулла дүшәнбә күни хәлқ сарийида учрашқанда, икки дөләт әмәлдарлири нефит, тәбий газ, кан байлиқлири вә мәбләғ селиш түрлири бойичә бир қатар келишимләр имзалиди. Шинхуа ахбарат агентлиқиниң хәвәр қилишичә, вен җябав сәуди падишаһиға " һәр иккила тәрәп пурсәтни чиң тутуп, һәмкарлиқни кеңәйтиш вә ортақ тәрәққият нишаниға йетиш керәк " дәйду.

Вен җябав, сәуди әрәбистан, әрәб бирләшмә хәлипилики, бәһрәйн, қатар вә омман қатарлиқ парис қолтуқи һәмкарлиқ комитетидики дөләтләр билән әркин сода келишими имзалаш қәдимини тезлитидиғанлиқини билдүргән. Бу сәуди әрәбистан падишаһиниң хитай - сәуди әрәбистан дипломатик мунасивәт орнатқандин бери хитайни тунҗи қетим зиярәт қилишидур. Хитай ташқий ишлар министирлиқи баянатчиси куң чүәнниң сөзи бойичә, уларниң сөһбити енергийә мәсилиси билән биргә һәрбий алақә вә террорлуқ қатарлиқ темиларға четилған болуши мүмкин. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.