Xitay, kembeghel döletlerge shertlik halda yardem qilishni xalaydu

Xitay dölet re'isi xu jintaw dunyadiki eng kembeghel döletlerge yardem qilishni xalaydighanliqini, lékin bu yardemning aldinqi sherti, bu döletler choqum teywenni étirap qilmasliqi kéreklikini jakarlidi.

Xu jintaw bu sözlerni charshenbe küni birleshken döletler teshkilatining yighinida qilghan bolup, u yene, xitay bilen déplomatik munasiwet ornatqan dunyadiki eng kembeghel 39 döletlerning köp qisim mehsulatlirigha baj almaydighanliqini bildürdi.

Xu jintaw xitayning bu döletlerge bajda étibar béripla qalmastin yene, tibbiy dorilarni bérish, qerzini bikar qilish we 1 milyard amérika dolliri qimmitide krédit bérish qatarliq yardemlerni béridighanliqini jakarlidi. Lékin xitay hökümitining bu yardemliri choqum bu döletler teywenni étirap qilmasliq shertini hazirlighandila andin bérilidu.

Emma Uyghur közetküchiler, xitay hökümitining esli bu qararni chiqirishtin burun, aldi bilen dölet ichidiki kembeghellik mesilisini hel qilishi kéreklikini, shundaqla xitayning chet yéza rayonliri we Uyghur élidiki jénini qamdishimu teske chöshiwatqan kembegheller nopusining hazir jiddiy yardemge éhtiyajliq ikenlikini bildürdi. (Peride)