Shangxey hemkarliq teshkilatidiki döletlerning tashqi ishlar ministirliri yighini échildi


2006-05-15
Share

Xitay, rusiye we ottura asiyadiki 4 jumhuriyetning tashqi ishlar ministirliri düshenbe küni xitayning shangxey shehirige toplinip, rayon bixeterliki we iran yadro pilani qatarliq mesililerni muzakire qilishqa bashlidi.

Mongghuliye, afghanistan, iran, hindistan we pakistan qatarliq döletler shangxey hemkarliq teshkilatining közetküchi ezasi bolsimu, lékin iran tashqi ishlar ministirining bu qétimqi yighin'gha ishtirak qilghan yaki qilmighanliqi hazirghiche melum emes. Bu qétimqi yighin xewpsizlik kéngishi iran yadro mesilisi üstide jiddi muzakire élip bériwatqan sezgür bir mezgilde échildi.

Shangxey hemkarliq teshkilatidiki 2 yétekchi chong dölet rusiye bilen xitay amérikining iran'gha imbargo qoyush pilanigha qarshi chiqmaqta we yawropa elliri amérikining pilanini qismen qollimaqta idi.

Shangxey hemkarliq teshkilatidiki döletler düshenbe küni iran qatarliq 5 döletning mezkur organ'gha qatnishishini qarshi alidighan bisharet berdi. Rusiye tashqi ishlar ministiri sérgéy lowrow muxbirlargha "bashqa döletler teshkilatimizgha nahayiti qiziqmaqta. Biz ular bilen muzakire élip bériwatimiz," dédi. Lékin shangxey hemkarliq teshkilatidiki bezi döletler mezkur teshkilatning kölimi qaysi derijide bolushi kérek, dégen mesilide bir birlikige ige emes.

Qazaqistan prézidénti nursultan nazarbayéw, " bizningche biz eza döletlerni cheklimisiz kéngeytsek bolmaydu," dédi. Bezi közetküchilerning eskertishiche, xitay bilen rusiye shangxey hemkarliq teshkilatini amérikining ottura asiyadiki tesir küchige qarshi riqabetlishish üchün qurghan. Xitay hökümiti bolsa mezkur teshkilatni rayondiki sherqiy türkistan küchlirige qarshi xelq'ara küch süpitide qollanmaqta. Bu qétimqi yighin shangxey hemkarliq teshkilatining bu yil 6 - ayda échilidighan bashliqlar yighini üchün bezi teyyarliq xizmetlirini ishleydu. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet