Shangxey hemkarliq teshkilati yighinining échilish murasimi shangxeyde ötküzüldi

Shangxey hemkarliq teshkilatigha eza döletlerning aliy derijilik rehberlirining 6 ‏- nöwetlik yighini 15 ‏- iyun küni shangxeyde échilish murasimi ötküzdi.

Iran yadro qoralliri pilanidin kélip chiqqan her xil munaziriler tüpeyli iran prizidéntining bu qétimqi yighin'gha közetküchi süpitide qatnishishi, her qaysi döletlerning mezkür yighin'gha qaratqan diqqitini téximu kücheytken.

Bügün chüshtin burun, xitay re'isi xu jintaw shangxeyde 6 terepke eza dölet rehberliridin qazaqistan prizidénti nazerbayéf, qirghizistan prizidénti baqiyif, rusiye prizidénti putin, tajikistan prizidénti imam eli raxmanof we özbikistan prizidénti kerimoflarni kütiwaldi.

Shinxu'a agéntliqining xewirige qarighanda, xu jintaw échilish murasimida söz qilip, shangxey hemkarliq teshkilatini tereqqi qildurush üchün alahide küch serp qilishni teshebbüs qilghan .

Bu qétimqi yighinning meqsidi, shangxey hemkarliq teshkilatigha eza döletler arisidiki herbiy we iqtisadiy hemkarliqlarni téximu mükemmelleshtürüshtin ibaret iken.

Bu arida mezkür teshkilatning xitay terep wekili, lyü jenchaw " üch xil küchlerge zerbe bérish, her qaysi terepning ortaq wezipisi " dep körsitip, bu herqaysi terep menpe'etigimu uyghun . Bolupmu hazirqi xelq'ara weziyet astida, bir döletning térrorchiliqqa yalghuz zerbe bérishi tolimu qéyin, shunga bu nuqtida xelq'ara jem'iyet birlishishi kérek " dégen.

Dunya Uyghur qurultiyining bayanatchisi dilshat rishit istansimizgha téléfun qilip, xitay hökümiti shangxey hemkarliq teshkilati dégen künlük astida, Uyghurlargha qaratqan zerbisini téximu kücheytmekchi" dédi, u sözide yene"xitay, mezkür teshkilat qurulghandin béri bolupmu 11 ‏- séntebir weqesidin kéyin, Uyghur pa'aliyetchilirige térrorchi dégen qalpaq bilen zerbe berdi shuningdek bu döletler bilen bolghan soda alaqisini kücheytish arqiliq qazaqsitan, qirghizistan we özbikistan döletlirini Uyghurlargha zerbe bérishte özlirige shirik qilishtek meqsidini ishqa ashurmaqchi" dédi. (Eqide)