Хитай һөкүмити америкиға сияси мәһбуслар тизимликини тапшурди


2005.02.07
Share on WhatsApp
Share on WhatsApp

Хитай һөкүмити америка даирилиригә хитай түрмисидики бир түркүм сияси мәһбуслар тизимликини тапшурған. Кишилик һоқуқ тәшкилатлири хитай даирилириниң һәрикитигә иҗабий баһа бәрмәктә.

Америка келәр айда чақирилидиған җәнвә кишилик һоқуқ йиғинида хитайни тәнқид қилиш яки қолмаслиқни ойлишиватқан бир чағда, хитай һөкүмити америкиға 51 кишилик сияси мәһбуслар тизимликини тапшурған. Тизимликтики мәһбусларниң бәзилири җаза муддити қисқартилғанлар, йәнә бәзилири қоюп беришни ойлишиватқанлар икән.

"Вашингтон почта гезити" ниң мәркизи сан-франсиско дики "сөһбәт фонди җәмийити" ниң сөзини нәқил кәлтүрүшичә, хитай һөкүмити сияси мәһбуслар тизимликини америка ташқи ишлар министирлиқиниң бир вәкилләр өмики өткән һәптә бейҗиңни зиярәт қилғанда америка тәрәпкә тапшурған.

Америка һөкүмити хитайни кишилик һоқуқни яхшилаш тоғрисидики вәдисигә вапа қилмиди, дәп тәнқид қилмақта. Хитайниң сияси мәһбуслар тизимликидики кишиләрниң он нәччиси тибәтләр икән. ” вашингтон почта гезити“, тизимликтики бәзи мәһбусларниң һазирғичә ташқий дуняға тонулмиған кишиләр икәнликини билдүрди. Сан- франсискодики " сөһбәт фонди җәмийити" ниң башлиқи җон кам, хитай һөкүмитиниң һәрикитини " зор илгирләш,"дәп махтиған. Амма мәркизи мюнхендики дуня уйғур қурултийиниң баянатчиси дилшат ришит, әгәр кишиләр шәрқий түркистанда сияси сәвәпләрдин қолға елинмиса шундақла юқириқи сәвәпләрдин қолға елинғанлар қоюп берилсә, бу ‘ һәқиқи илгирләш" болиду, дәп көрсәтти. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.