Америка билән хитай 2 - нөвәтлик истратегийилик сөһбәт өткүзиду
2005.11.29
Хитайниң муавин ташқи ишлар министири дәй биңго 7 - декабирдин 8 - декабирғичә америкини зиярәт қилип, 2 - басқучлуқ хитай - америка истратегийилик сөһбитини елип бариду.
Франсийә ахбарат агентлиқиниң хәвәр қилишичә, америкиниң муавин ташқи ишлар министири роберт золейк дәй биңго билән сөһбәт җәрянида, америка - хитай икки дөләт көңүл бөлидиған ортақ мәсилиләр вә хәлқара мәсилиләр үстидә пикир алмаштуридикән.
Хитай дөләт рәиси ху җинтав билән америка президенти җорҗи буш өткән йили елип барған учришиштин кейин, икки дөләт оттурисида юқири дәриҗиликләрниң истратегийилик сөһбити елип беришни қарар қилған. Президент буш йеқинда хитайни америкиниң " истратегийилик шерики," дәп аташни рәт қилип, икки дөләтни "истратегийилик риқабәтчиләр" дәп атиған иди.
Хитай һәрбий хам чотини үзлүксиз көпәйтиши шундақла америкиниң содидики қизил рәқими қатарлиқ мәсилиләр америкини җидди әндишигә селиватқан мәсилиләр иди. Икки дөләтниң бу йил 8 - айда елип берилған тунҗи нөвәтлик истратегийилик сөһбити енергийә, бихәтәрлик, террорчилиқ, иқтисади тәрәққият вә сода, демократийә вә кишилик һоқуқ қатарлиқ мәсилиләрни музакирә қилған.
Золейк, 1 - нөвәтлик хитай - америка истратегийилик сөһбитидин кейин, "америка сияситиниң нишани хитайни дуняниң бихәтәрлик, иқтисади вә сияси системиси билән бир пүтүнләштүрүш," дәп тәкитлигән. (Әркин)