Amérika bilen xitay 2 - nöwetlik istratégiyilik söhbet ötküzidu

Xitayning mu'awin tashqi ishlar ministiri dey binggo 7 - dékabirdin 8 - dékabirghiche amérikini ziyaret qilip, 2 - basquchluq xitay - amérika istratégiyilik söhbitini élip baridu.

Fransiye axbarat agéntliqining xewer qilishiche, amérikining mu'awin tashqi ishlar ministiri robért zoléyk dey binggo bilen söhbet jeryanida, amérika - xitay ikki dölet köngül bölidighan ortaq mesililer we xelq'ara mesililer üstide pikir almashturidiken.

Xitay dölet re'isi xu jintaw bilen amérika prézidénti jorji bush ötken yili élip barghan uchrishishtin kéyin, ikki dölet otturisida yuqiri derijiliklerning istratégiyilik söhbiti élip bérishni qarar qilghan. Prézidént bush yéqinda xitayni amérikining " istratégiyilik shériki," dep atashni ret qilip, ikki döletni "istratégiyilik riqabetchiler" dep atighan idi.

Xitay herbiy xam chotini üzlüksiz köpeytishi shundaqla amérikining sodidiki qizil reqimi qatarliq mesililer amérikini jiddi endishige séliwatqan mesililer idi. Ikki döletning bu yil 8 - ayda élip bérilghan tunji nöwetlik istratégiyilik söhbiti énérgiye, bixeterlik, térrorchiliq, iqtisadi tereqqiyat we soda, démokratiye we kishilik hoquq qatarliq mesililerni muzakire qilghan.

Zoléyk, 1 - nöwetlik xitay - amérika istratégiyilik söhbitidin kéyin, "amérika siyasitining nishani xitayni dunyaning bixeterlik, iqtisadi we siyasi sistémisi bilen bir pütünleshtürüsh," dep tekitligen. (Erkin)