Бейҗиң билән хоңкоң демократлири арисида елип берилған сөһбәт нәтиҗисиз ахирлашти

Бейҗиң даирилири билән хоңкоң демократлири оттурисида пәйшәнбә күни шинҗенда елип берилған сөһбәт нәтиҗисиз ахирлашти. Хоңкоң парламентиниң өктичи әзалири җүмә күни хитай даирилириниң хоңкоңда омуми сайлам елип бериш вақит җәдивили тәләп қилиш пиланидин ваз кечип, асаси қанун кризиси келип чиқиштин сақлиниш тоғрисидики тәлипини рәт қилди.

Хоңкоң парламентидики демократик күчләр, хитай хәлқ қурултийиниң муавин баш катипи чяв шявяңниң тәлипи билән , йәкшәнбә күни өткүзилидиған намайишни тохтуталмайду, дәп көрсәтмәктә. Хоңкоң парламент әзалири пәйшәнбә күни шинҗенда чяв шявяң қатарлиқ хитай әмәлдарлири билән 2 саәт сөһбәт елип барди.

Чяв шявяң, хоңкоң парламент әзалиридин омуми сайлам вақит җәдивили бәлгиләш тәлипидин ваз кечишни тәләп қилған. Хоңкоң парламентиниң демократик әзаси йоң сум, " бу қетимқи сөһбәттин наһайити үмитсизләндуқ " дәйду. Йоңниң әскәртишичә, чяв шявяң хоңкоң вәкиллиридин һөкүмәтниң ислаһат пиланини қобул қилишни тәләп қилған. Парламент әзаси емили лав, бу қетимқи сөһбәтни " чяв шявяңниң вақит исрапчилиқи " дәп тәриплиди. Хоңкоң демократлири йәкшәнбә күни нәччә он миң кишилик намайиш өткүзүшкә тәйярланмақта. (Әркин)