Robért zoléyk, béyjingda xitay - amérika munasiwetliri boyiche söhbet élip bardi


2006.01.24
Share on WhatsApp
Share on WhatsApp

Amérikining mu'awin tashqiy ishlarministiri robért zoléyk, seyshenbe küni béyjingda xitay rehberliri bilen xitay - amérika otturisida talash tartishtiki soda mesilisi, xitayning herbiy tereqqiyati we xitay kishilik hoquq xatirisi qatarliq mesililer boyiche söhbet élip bardi. Zoléyk, xitay bash ministiri wén jyabaw we tashqiy ishlar ministiri li jawshinglar bilen uchrashqan.

Birleshme axbarat agéntliqining xewer qilishiche, ularning söhbiti xu jintawning bu yil ichide amérikida élip baridighan ziyaret küntertipige chétilghan bolushi mümkin. Xu jintaw ötken yili 9 - ayda amérikini ziyaret qilmaqchi bolghan. Emma uning ziyariti tuyuqsiz kéchiktürülgen idi. Amérikining xitayda turushluq elchixanisi seyshenbe küni xu jintawning bu yil 4 - ayda amérikini ziyaret qilidighanliqini jakarlidi.

Zoléyk ötken ayda xitayning mu'awin tashqiy ishlar ministiri dey binggo bilen washin'gtonda söhbet élip barghan. U, düshenbe küni béyjinggha yétip keldi. Zoléyk, xitay emeldarliri bilen ikki dölet munasiwiti, xelq'ara mesililer, qirghinchiliq xaraktérlik qorallar we bixeterlik mesilisi boyiche söhbet élip baridighanliqini bildürgen. U, " amérika bilen xitay xelq'ara séstimidiki ikki muhim shérikler. Bir - birimizni tingshash, teng güllinish, tinchliq, kishilik hoquqqa hörmet qilish, qanun boyiche ish körüsh bizning ortaq menpe'etmiz" deydu.

Zoléyk xitay rehberliri bilen körüshkendin kéyin, chingdugha bérishi mümkin. U bu yerde müshük éyiq tetqiqat merkizini ziyaret qilidu we yerlik emeldarlar bilen söhbet élip baridu. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet