Хитай һөкүмти, дуңҗуда 19 киши үстидин сот ачти


2006.06.27
Share on WhatsApp
Share on WhatsApp

Америкида чиқидиған нюйорк гезитидә елан қилинған бир мақалидә, хитай һөкүмитиниң өткән йили дикабир ийида шәнвий шәһири йеқиндики дуңҗу йезисида йүз бәргән бастуруш вәқәсини техичә йошуруватқанлиқи тәкитләнди.

Йеза аһалисиниң билдүрүшичә, вәқәдә аз дегәндә 300 киши хитай сақчилири тәрипидин өлтүрүлгән шундақла йәнә нурғунлиған киши из-дирәксиз ғайиб болған. Лекин хитай һөкүмәт даирлири бу вәқә һәққидә я наһайити аз учур бәргән вәяки вәқә тоғрисида учур бериштин өзлирини қачуруп, униң орниға йүз бәргән бу қанлиқ вәқә тоғрисидики хәвәрләрниң хитайниң башқа районлириға тарқилишиниң алдини елишқа тиришқан.

Һовард фрнч тәрипидин елан қилинған мақалидә ейтилишичә, хитай даирилири, дуңҗу йезисида йүз бәргән вәқә һәққидә бәргән чәклик учурлирида пәқәт йеза аһалисни әйиблигән һәмдә гәрчә вәқәдин алтә өткән болсиму, бу қанлиқ бастуруш һәққидә һечқандақ рәсмий тәкшүрүш елип бармиған.

Мақалидә тәкитлинишичә, хитай һөкүмити бастуруш һәққидә рәсмий тәкшүрүш илип бериш орниға, аста-аста вәқә һәққидики делони йепишқа тиришиқан . Бу айниң башлирида йеза аһалисидин 19 кишини җим-җит очуқ сот қилип, уларниң 7 сини амминиң тәртипини бузуп қалаймиқанчилиқ чиқарған вә сақчиларға партлатқуч дориси билән һуҗум қилған дегәнгә охшаш җинайәт билән әйибләп, уларни узун мудәтлик қамақ җазасиға һөкүм қилған. Лекин сотниң қарарида вәқә җәрянида адәмләрниң өлгәнлики һәққидә һеч немә дейилмигән.

Һовард фрнчниң нюйорк вақти гезитидә елан қилған мақалисидә билдүрүшичә, сотниң қарариға қаттиқ наразилиқ билдүргән йеза аһалиси, һөкүмәт даирилириниң хусуси сөһбәтләрдә вәқә җәрянида үч кишиниң үлгәнликини етирап қилғанлиқини, әмма һөкүмәт хадимлириниң уларни буниңдин көп адәм өлгәнлики тоғрисида һечкимгә учур бәрмәслики тоғрисида агаһландурғанлиқини билдүргән. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.