Профессор су хитайниң әтрапидики милләтләрни тәтқиқ қилишта йәрлик язма материялларни асас қилишни тәшәббус қилди


2008-01-22
Share

Тәйвән мәдәнийәт пәнлири университетиниң профессори су җя хуң әпәнди тебәт миллитиниң һазирқи әһвали тоғрисида "муһаҗирәттики милләт" намлиқ бир китаб йезип нәшр қилдурған иди. Профессор су 1 ‏- айниң 22 ‏- күни чүштин бурун әркин асия радиосиға кәлгәндә, мухбирлиримизниң суаллириға җаваб бәрди.

Су җя хуң әпәндиниң қаришичә, коммунист хитай һөкүмити тебәтләрни дуняға 'җин-алвасти' қилип көрситишкә урунуп кәлди. Уларни қолидин келишичә 'яман'лиди. Һазир су әпәнди уйғур миллий һәрикитиниң йетәкчиси рабийә ханимғиму хитай һөкүмити шундақ тәләппузда муамилә қиливатқанлиқини сәзгән. Шуңлашқа у һазир буниң әмәлийитини билмәкчи икәнликини изһарлиди.

Профессор су мухбирлиримизниң суаллириға җаваб бәргәндә, төвәндики бир қатар мәсилиләр үстидә тохталди.

Профессор су 'аз санлиқ милләт' дегән аталғуни рәт қилиду профессор су мухбирларниң суаллириға җаваб бәргәндә, алди билән коммунист хитай һөкүмитиниң 'аз санлиқ милләт' дегән аталғусини рәт қилди. Униң қаришичә, чоң қуруқлуқта 'оттура түзләңлик' дегән бир аталғу бар. Коммунист һөкүмити бу аталғуға тәбир берип 'оттура түзләңлик җуңгониң мәркизи' , 'һәммә мәдәнийәт мушу мәркәздин әтраптики аз санлиқ милләт районлириға тарқалған' дәп чүшәндүриду. Хитай һөкүмити әтраптики башқа милләтләргә мушу чүшәнчә билән муамилә қилиду. Әмәлийәттә, ‏-‏ дәйду су әпәнди, ‏-‏ қәдимқи заманларда оттура түзләңлик районида пәқәт һәр хил намдики сулалиләр қурулған, у бирла милләтниң сулалисиму әмәс, башқа милләтләрму бу районда сулалә қурған, әтраптики башқа милләтләрниңму оттура түзләңлктин башқа районларда өзиниң сулалилири болған. Әтраптики башқа милләтләрниң һәммиси қәдимқи заманда 'аз санлиқ' әмәс иди. Риаллиққа һүрмәт қилғанда, хитай һөкүмити қоллиниватқан 'аз санлиқ милләт' дегән аталғу тоғра әмәс, униңда бәлки кәмситиш мәниси бар.

Хитай болмиған милләтләрни тәтқиқ қилғанда йәрлик язма тарихни асас қилиш керәк

Профессор суниң ейтишичә, у хитай болмиған башқа милләтләрни тәтқиқ қилишта хитайчә сулалә китаблиридики мәлуматларни ишләтмәйду. Униң қаришичә, 'синиң шәрқий түркстаниң, миниң ғәрбий диярим' дегән китаб 'оттура түзләңликни мәркәз қилған хитай мәдәнийити' дегән көз қараш асасида йезилған. Су әпәнди бундақ көз қарашни рәт қилиду. У хитайниң әтрапидики милләтләрниң тарихини тәтқиқ қилғанда, йәрлик милләтниң өзиниң материяллирини вә һазирқи әмәлйитини етирап қилишни яқлайду.

'Шинҗаң әзәлдин җуңгониң бирқисми' дегән көз қараш тоғра әмәс

Тәйвән мәдәнийәт пәнлири университетиниң профессори су җя хуң әпәнди 'шинҗаң әзәлдин җуңгониң бирқисми' дегән көз қарашни рәт қилиду. Униң қаришичә, 'шинҗаң' дегән йеңи чегра дегән сөз, бу сөзниң өзидинла униң 'әзәлдин җуңго бир қисми' әмәслики көрүнүп туриду. Хитайниң тәйвән билән мунасивити бар , дейилсә, у аран 400 йилиғила бариду, әмма тәйвән өзи бир дөләт болуп туруватқили узун йиллар болуп қалди, бу бир нәқ әмәлийәт. У риаллиққа һөрмәт қилишни тәшәббус қилиду.

Хитай һөкүмити әтраптики башқа милләтләрни террорчилиққа қарши турушни баһанә қилип бастуруватиду

Профессор суниң қаришичә, коммунист хитай һөкүмити тәйвәнгә қарита америка -хитай мунасивитидин пайдилинип бесим ишлитиватиду, әтраптики башқа милләтләрниму, хитай һөкүмити йәнила америка -хитай оттурисиидики террорчилиққа қарши туруш мунасивитини баһанә қилип бастуруватиду. )Вәли(

юқиридики улиништин, мухбиримиз вәлиниң бу һәқтики мәлуматини аңлайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт