Xitay amérikining sün'iy hemrahgha qarshi bashqurulidighan siniqi toghrisida sözlishish teklipige jawap bermigen

Xitay herbiy da'iriliri 11 - yanwar küni sün'iy hemrahgha qarshi bashqurulidighan bomba siniqi élip barghandin kéyin, amérika xitayning bu qétimqi herbiy siniqi toghrisida chüshenche bérishini telep qilghan bolsimu, lékin xitaylar hazirgha qeder amérika terepning telipige jawap bermigen.

"Nyu york waqti géziti" ning eskertishiche, amérika da'iriliri xitay terepning néme üchün sün'iy hemrahgha qarshi qorallarni tereqqi qilduridighanliqigha chüshenche bérishni ümid qilmaqta. Amérika tashqi ishlar ministirlikining ismini ashkarilashni xalimaydighan yuqiri derijilik bir emeldari amérika metbu'atlirigha alem boshluqidiki hadisiler amérika dölet bixeterliki, iqtisadi we tashqi siyaset menpe'etige zich munasiwetlik, dep körsetti.

Mezkur emeldar xitayning herikiti xelq'ara alem boshluqi kélishimining meqsiti we rohigha xilap, deydu. U, amérikining alem boshluqidiki eslihelirini qoghdash we mudapi'e qilish hoquqini saqlap qalidighanliqini bildürmekte. Xitayning herbiy siniqi bosh hökümitining endishisini qozghapla qalmay, amérika dölet mejlisiningmu diqqitini qozghidi.

Amérika kéngesh palatasi tashqi munasiwetler komitétining re'isi josép baydén, xitayning herbiy siniqini ighwagerchilik, deydu lékin u, buninggha heddidin ziyade bi'aram bolush ketmeydighanliqini tekitlidi shundaqla alem boshluqi herbiy hazirliqlar musabiqisi élip bérishke qarshi turidighanliqini bildürdi. (Erkin)