Xitay hökümitining alem boshluqida élip barghan bashqurulidighan bomba siniqi hindistanningmu tenqidige uchridi
2007.02.05
Xitay hökümitining 11- yanwar küni alem boshluqida élip barghan bashqurulidighan bomba siniqi amérika, yawropa ittipaqi hemde yaponiyining qattiq tenqidige uchrighan. Xitay hökümitining bashqurulidighan bomba siniqi hetta amérika we yawropa ittipaqidiki xitayning tereqqiyati gherb üchün tehdit emes dégen köz qarashni tekitlep kéliwatqan siyasetchiler we mulahizichilernimu oygha sélip qoyghan idi. Ular, xitayning bu herikiti alem boshluqida bir herbiy riqabetning bashlinishigha seweb bolushi mumkin dep bildürgen.
Düshenbe küni hindistan hökümitimu xitayning bu herikitini tenqid qilghan hökümetler sipige qoshuldi. Roytris agéntliqining xewer qilishiche, hindistanning alem boshluqi tetqiqat idarisining re'isi madhawan nayer düshenbe küni bergen bayanatida, xitay hökümitining alem boshluqida élip barghan bashqurulidighan bomba siniqini qattiq tenqid qilip, béyjing hökümitining bu herikiti xelq'ara qa'ide-qanunlargha xilap, biz alem boshluqini qorallandurmasliqimiz kérek, dep körsetken. Uning éytishiche, bundaq sinaq arqiliq bir sun'iy hemrahni yoqitish, alem boshluqidiki exlet miqdarini köpeytiwitidiken.
Madhawandin burun hindistan tashqi ishlar ministiri mukerji alem boshluqini qorallandurushni toxtitish kéreklikini tekitlep, bundaq bir heriket pütün döletlerning tereqqiyatigha selbiy tesir yetküzidu, dep körsetken idi.
Nurghunlighan siyasiy mulahizichiler, xitay hökümiti alem boshluqida bashquruludighan bomba siniqi élip barghandin kéyin, xitayning iqtisadi küchini herbiy küchke aylandurush niyiti yoq, shuning üchün xitayni bir tehdit dep qarimasliq kérek, dégen köz qarashni bikar qilghanliqini bildürmekte. (Qanat)
Munasiwetlik maqalilar
- Amérika awam palata ezaliri amérikining xitaygha qarshi alem boshluqi riqabet küchini kücheytishke chaqirdi
- Alem boshluqidimu xitayning exletliri leyleydu
- Xitay amérikining sün'iy hemrahgha qarshi bashqurulidighan siniqi toghrisida sözlishish teklipige jawap bermigen
- Xelq'ara jem'iyet xitayning sün'iy hemrahgha qarshi lazir nurluq qoral sinaq qilghanliqini eyiblidi
- Xujintawning hindistan ziyaritining üchinchi künide