Хитай һөкүмитиниң йәнә суний һәмраһқа қарши башқурулидиған бомба синиқи елип бериш пилани йоқ

Хитай дөләт мудапиә министири, хитай һөкүмитиниң йәнә суний һәмраһқа қарши башқурулидиған бомба синиқи елип бериш пилани йоқ, деди.

японийиниң кийодо хәвәр агентлиқиниң билдүрүшичә, хитай мудапиә министири сав гваң чүән японийиниң сабиқ мудапиә министири фукуширо нукагаға "бизниң қайта башқурулидиған бомба синиқи елип бериш пиланимиз йоқ" дегән.

Хитай һөкүмити, 11‏- январ күни елип барған суний һәмраһқа қарши башқурулидиған синиқини икки һәптә кейин етирап қилған иди. Гәрчә хитай һөкүмити аләм бошлуқини қоралландурушқа қарши икәнликини тәкитлигән болсиму, әмма америка вә японийә һөкүмәтлири хитай һөкүмити тәрипидин аләм бошлуқида елип берилған башқурулидиған бомба синиқиниң, аләм бошлуқини қораллардин хали тутуш һәрикитигә қаттиқ зәрбә бәргәнликини билдүрмәктә.

Хитай һөкүмити тәрипидин аләм бошлуқида елип берилған башқурулидиған бомба синиқини тәнқид қилған нурғун дөләтләр, бу синақ нәтиҗисидә аләм бошлуқида пәйда болған әхләтләрниң суний һәмраһларниң паалийитигә сәлбий тәсир йәткүзидиғанлиқидин әндишә қиливатқанлиқини баян қилмақта.

Хитай һөкүмити тәрипидин аләм бошлуқида елип берилған башқурулидиған бомба синиқи, хәлқара җамаәттә хитайниң нийәт вә мәқсәтлири һәққидә нурғун муназириләрниң қозғилишиға сәвәб болди.

Хәвәрләргә қариғанда, бу синақ һәтта ғәрб дөләтлиридики, хитайниң илгирилишиниң дуня үчүн һечқандақ сәлбий тәсири болмайдиғанлиқини тәкитләп келиватқан гуруппиларниму, әндишиләндүргән. (Қанат)