Xitay hökümitining yene sun'iy hemrahqa qarshi bashqurulidighan bomba siniqi élip bérish pilani yoq

Xitay dölet mudapi'e ministiri, xitay hökümitining yene sun'iy hemrahqa qarshi bashqurulidighan bomba siniqi élip bérish pilani yoq, dédi.

Yaponiyining kiyodo xewer agéntliqining bildürüshiche, xitay mudapi'e ministiri saw gwang chü'en yaponiyining sabiq mudapi'e ministiri fukushiro nukagagha "bizning qayta bashqurulidighan bomba siniqi élip bérish pilanimiz yoq" dégen.

Xitay hökümiti, 11‏- yanwar küni élip barghan sun'iy hemrahqa qarshi bashqurulidighan siniqini ikki hepte kéyin étirap qilghan idi. Gerche xitay hökümiti alem boshluqini qorallandurushqa qarshi ikenlikini tekitligen bolsimu, emma amérika we yaponiye hökümetliri xitay hökümiti teripidin alem boshluqida élip bérilghan bashqurulidighan bomba siniqining, alem boshluqini qorallardin xali tutush herikitige qattiq zerbe bergenlikini bildürmekte.

Xitay hökümiti teripidin alem boshluqida élip bérilghan bashqurulidighan bomba siniqini tenqid qilghan nurghun döletler, bu sinaq netijiside alem boshluqida peyda bolghan exletlerning sun'iy hemrahlarning pa'aliyitige selbiy tesir yetküzidighanliqidin endishe qiliwatqanliqini bayan qilmaqta.

Xitay hökümiti teripidin alem boshluqida élip bérilghan bashqurulidighan bomba siniqi, xelq'ara jama'ette xitayning niyet we meqsetliri heqqide nurghun munazirilerning qozghilishigha seweb boldi.

Xewerlerge qarighanda, bu sinaq hetta gherb döletliridiki, xitayning ilgirilishining dunya üchün héchqandaq selbiy tesiri bolmaydighanliqini tekitlep kéliwatqan guruppilarnimu, endishilendürgen. (Qanat)