Хитай ташқи ишлар министирлики америкиниң тәйвәнгә қорал сетип беришини әйиблиди

Хитайниң муавин ташқи ишлар министири җов венҗоң чаршәнбә күни америкиниң тәйвәнгә қорал сетип бериш һәрикитини әйипләп, буниң хитай-америка мунасивәтлиригә зиян йәткүзидиғанлиқини билдүрди.

Ройтерис ахбарат агентлиқиниң хәвәр қилишичә, җов америкиниң тәйвәнгә қорал сетип беришни дәрһал тохтитиши керәкликини, болмиса буниң тәйвәнниң мустәқиллиқини риғбәтләндүрүп, районниң тинчлиқиға тәһдит болидиғанлиқини тәкитлиди.

Җов венҗоң сөзидә йәнә, америкиниң тәйвәнгә қорал сетип беришидин башқа йәнә, хитайниң кишилик һоқуқини әйиплиши вә хоңкоңниң ички ишлириға арилишишиму икки дөләт мунасивитидики тосалғулар икәнликини көрсәтти.

У йәнә, америкида җиддий елип бериливатқан прездент сайлам риқабити үстидиму тохтулуп, бу қетимлиқ сайлам риқабитиниң ениқ чүшәндүрүш берилмигән әһвал астида, хитай-америка мунасивәтлирини мурәккәпләштүривәткәнликини билдүрди.

Җовниң бу сөзлири дүшәнбә күнидики америка дөләтлик җумһурийәтчиләр партийәси вәкилләр қурултийида оттуриға чиққан хитайға анчә достанә болмиған сөз ибариләргә қаритилған болуп, униңда америкиниң хитайниң тәйвәнгә һәрбий күч ишлитишигә йол қоялмайдиғанлиқи вә хитайниң кишилик һоқуқ әһвалиға аит мәзмунлар көрситилгән иди. (Пәридә)