خىتاي ھۆكۈمىتى چارشەنبە كۈنى تەيۋەن پرېزىدېنتى چېن شۈيبىيەن ئوتتۇرىغا قويغان، نۆۋەتتە قوللىنىۋاتقان "جۇڭخۇا مىنگو" دېگەن دۆلەت نامىنى قىسقارتىپ "تەيۋەن" گە ئۆزگەرتىش تەكلىپىنى ئەيىبلىدى.
فرانسىيە ئاخبارات ئاگېنتلىقىنىڭ خەۋىرىدە كۆرسىتىلىشىچە، خىتاي تەيۋەن ئىشلىرى ئىشخانىسى چېن شۈيبىيەننىڭ، دۆلەت نامىنى ئۆزگەرتىش ئۇسۇلى بىلەن مۇستەقىللىقنى ئىستەشكە ئۇرىنىۋاتقانلىقىنى ئەيىبلەپ، چېن شۈيبىيەنگە قارىتىلغان ھۇشيارلىقنى ئۈستۈن تۇتۇش كېرەكلىكىنى بىلدۈردى.
چېن شۈيبىيەن بۇ يىل -5 ئايدا تەيۋەن پرېزدېنتلىكىكە قايتا سايلانغان بولۇپ، بۇ خىتاي ھۆكۈمىتىنىڭ نارازىلىقىنى قوزغىغان ئىدى. ئەمدىلىكتە چېننىڭ، خىتاي بىلەن بىۋاسىتە باغلىنىشىنى ئىپادىلەيدىغان " جۇڭخۇا مىنگو" دېگەن نامنى ئىشلەتمەسلىككە تىرىشىشى، خىتاينىڭ غەزىۋىنى تېخىمۇ قوزغىدى.
بۇنىڭدىن سىرت خىتاي ھۆكۈمىتى يەنە، ئامېرىكا ئاۋام پالاتاسى يېقىندا ماقۇللىغان "خوڭكوڭنىڭ ئەركىنلىكىنى قوللاش" قارارىغىمۇ كۈچلۈك نارازىلىق بىلدۈرۈپ، ئامېرىكا ھۆكۈمىتىنىڭ خىتاينىڭ ئىچكى ئىشىغا ئارىلاشماسلىقىنى يەنە بىر قېتىم تەكىتلىدى. (پەرىدە)