Хитай чен шүйбийәнни мустәқиллиқ хаһиши бар дәп әйиплиди

Хитай дөләт кабинтиниң тәйвән ишлири ишханиси тәйвәнни агаһландуруп, “"әгәр тәйвән асасий қанун ислаһатини илгири сүрүш арқилиқ мустәқиллиқни тәрғип қилидикән, хитай буниңға қәти қарши туриду" дегән.

Әнглийә б б с радио-телевизийә ширкитиниң хәвиригә қариғанда, хитай тәйвән ишлири ишханисиниң баянатчиси ли веййи чаршәнбә күнидики мухбирларни күтивелиш йиғинида тәйвән президенти чен шүйбийәнни тәнқитләп, униң әзәлдин тәйвәнни мустәқил қилиш ирадисидин янмиғанлиқини һәмдә буни пурсәт болсила һәр хил усуллар билән ипадиләватқанлиқини тәкитлиди.

Ли веййи сөзидә йәнә, чен шүйбийәнниң асасий қанун ислаһатини тәрғип қилишидики түп мәқситиниң тәйвәнни хитайдин айрип чиқиш икәнликини әскәртип, әгәр чен бу усулни қолланса, хитайниң қандақ бәдәл төләштин қәтинәзәр буни битчит қилидиғанлиқини агаһландурған.

Хитай бу инкаслирини чен шүйбийән йеқинда қилған "тәйвән өз игилик һоқуқиға игә мустәқил дөләт. Шуңа униң өзигә лайиқ вә мас келидиған йеңи асасий қануни болиши керәк" дегән сөзлиригә қарита елан қилған.

Ли веййи сөзидә йәнә, тәйвәнниң бирләшкән дөләтләр тәшкилатиға әза болуш салаһийитигә игә әмәсликини тәкитлиди. Бир нәччә күн авал чен шүйбийән бу йил, илгирикидәк " җуңхуа минго" әмәс, бәлки " тәйвән" дегән нам билән б д т ға әза болушни илтимас қилиш керәкликини көрсәткән иди. (Пәридә)