Xitay chén shüybiyenni musteqilliq xahishi bar dep eyiplidi

Xitay dölet kabintining teywen ishliri ishxanisi teywenni agahlandurup, “"eger teywen asasiy qanun islahatini ilgiri sürüsh arqiliq musteqilliqni terghip qilidiken, xitay buninggha qet'i qarshi turidu" dégen.

En'gliye b b s radi'o-téléwiziye shirkitining xewirige qarighanda, xitay teywen ishliri ishxanisining bayanatchisi li wéyyi charshenbe künidiki muxbirlarni kütiwélish yighinida teywen prézidénti chén shüybiyenni tenqitlep, uning ezeldin teywenni musteqil qilish iradisidin yanmighanliqini hemde buni purset bolsila her xil usullar bilen ipadilewatqanliqini tekitlidi.

Li wéyyi sözide yene, chén shüybiyenning asasiy qanun islahatini terghip qilishidiki tüp meqsitining teywenni xitaydin ayrip chiqish ikenlikini eskertip, eger chén bu usulni qollansa, xitayning qandaq bedel töleshtin qet'inezer buni bitchit qilidighanliqini agahlandurghan.

Xitay bu inkaslirini chén shüybiyen yéqinda qilghan "teywen öz igilik hoquqigha ige musteqil dölet. Shunga uning özige layiq we mas kélidighan yéngi asasiy qanuni bolishi kérek" dégen sözlirige qarita élan qilghan.

Li wéyyi sözide yene, teywenning birleshken döletler teshkilatigha eza bolush salahiyitige ige emeslikini tekitlidi. Bir nechche kün awal chén shüybiyen bu yil, ilgirikidek " jungxu'a min'go" emes, belki " teywen" dégen nam bilen b d t gha eza bolushni iltimas qilish kéreklikini körsetken idi. (Peride)