Chin shüybyen xitay rehberlirini teywen hökümiti bilen biwaste munasiwet ornitishqa chaqirdi

Seyshenbe küni, teywen prézidénti chin shüybyen xitay rehberliridin, teywendiki siyasiy öktichiler bilen munasiwet ornitish ornigha, uning hökümiti bilen biwaste munasiwet qilishini telep qildi.

Chin shüybyen seyshenbe küni, amérikining sabiq sherqiy asiya we tinch okyan ishlirigha mes'ul tashqi ishlar yardemchi ministiri rendi shiriyerbilen teybéyde ötküzgen söhbiti jeryanida, xitay hökümitidin teywen mesilisini bir terep qilish üchün teywenning saylan'ghan hökümiti bilen munasiwet qurushini telep qildi.

U mundaq dédi "teywen hökümiti bilen munasiwet qurush, ikki terep otturisidiki mesilini hel qilishning eng yaxshi yoli. Eger béyjing rehberliri dawamliq teywen hökümitini bir terepke qayrip qoyushqa tirishsa bu, mesililerni téximu qiyinlashturidu", dédi.

Xitay hökümiti chin shüybyenni yoshurun halda, teywenning musteqilliqini qollawatidu dep eyiblep, uning hökümiti bilen biwaste munasiwet qurushni ret qilip, yéqindin béri teywendiki teywenning xitay bilen birlishishni qollaydighan partiyilerning rehberlirini xitaygha teklip qilish arqiliq chin shüybyen hökümitini siyasiy jehettin yalghuz qaldurushqa tirishiwatidu.

Chin shüybyen, "teywen xelqi, xitayning bu heriketliri arqiliq teywen xelqini bölüp parchilashqa urunuwatqanliqini chüshinip yetti. Lékin biz yenila sewr qilip, eqil - parastimizni ishqa sélip, xitay bilen di'alog ilip bérish üchün tirishimiz", dédi. (Qanat)