Teywen: xitay teywenning nöwettiki weziyitini chüshenmeydu

Xitay dölet re'isi xu jintaw teywen prézidénti chén shüybyenning dölet birliki komitétini bikar qilish qararini eyibligendin kéyin, teywenning chong quruqluq ishliri komitéti charshenbe küni buninggha inkas qayturup, teywen bilen xitayning ezeldin bir-birige qarashliq emeslikini, shundaqla teywenning igilik hoquqigha ige bir musteqil dölet ikenliki teywenning hazirqi weziyiti hésablinidighanliqini éytti.

Teywendiki chong quruqluq ishliri komitétining re'isi wu jawshyong, teywen prézidénti chén shüybyenning del teywenning hazirqi weziyitini saqlap qélish üchün mushundaq qiliwatqanliqini, xu jintaw we bashqa xitay bashliqlirining inkasi ularning teywenning nöwettiki weziyitini chüshenmeydighanliqidin dérek béridighanliqini bildürdi.

U sözide yene, " teywenning igilik hoquqi ezeldin 23 milyon teywen puqrasigha tewe. Peqet teywen xelqiningla teywenning nöwettiki weziyitige qarar bérish hoquqi bar" dédi. U yene, teywende her qandaq özgirish hasil qilish üchün yenila aldi bilen teywen xelqining murajitige qulaq sélish kéreklikini éytip, " xitayning öz aldigha teywenni xitayning bir qismi diyishi, teywenning hazirqi weziyitige xilap bir heriket" dep körsetti.

Chén shüybyenning dölet birliki komitétini bikar qilish qarari amérikiningmu qarshi élishigha uchrimighan idi. Emma amérika dölet bixeterlik komitétining asiya ishlirigha mes'ul dériktori kénnés libérsal (Kenneth Lieberthal) charshenbe küni béyjing hökümitining bundaq küchlük inkas qayturup teywen'ge tehdit ishlitishtin saqlinishi kéreklikini, chünki tehditning chén shüybyenning musteqilliq herikitini téximu kücheytip qoyidighanliqini bildürdi.

Teywenning chong quruqluq ishliri komitéti re'isi wu jawshyong sözide yene, xitay hökümitini siyasiy erkinlikni téximu qoyup bérishke chaqirip, mushundaq bolghanda ,xitayning andin teywen mesiliside toghra qarar chiqiralaydighanliqini hemde buning ikki qirghaq munasiwitige paydiliq bolidighanliqini bildürdi.(Peride)