Xitay xelq qurultiyi yighinida teywen musteqilliqi agahlanduruldi

Xitayning memliketlik xelq qurultiyi yighinining yekshenbe künidiki échilish murasimida, xitay bash ministiri wén jyabaw teywenning xitay bilen bolghan birlik xizmitini kücheytishni we yézilardiki mesililerni hel qilishni tekitlidi. U yene, teywenning xitay bilen birlishishige tosqunluq qilidighan her qandaq heriketning meghlub bolidighanliqini agahlandurdi.

Gerche xitay hökümiti teywenning tinch yolda birlishishini xalaydighanliqini tekitlisimu, lékin yéqindila xitayning bu yilliq herbiy xirajitini yene 15% ashuridighanliqini jakarlighan. Ötken hepte teywen prézidénti chén shüybyenning dölet birliki komitétini bikar qilish qararini otturigha qoyushi, ikki terep otturisidiki munasiwetni téximu jiddiyleshtüriwetti.

Wén jyabaw yighinda yene, yézilargha qaritilghan ma'arip meblighi, dawalinish we asasiy eslihe qurulush sahelirige ajritidighan mebleghni téximu ashurush pilanini otturigha qoydi. Bu pilanning asasliq meqsiti baylar bilen kembegheller otturisidiki perqni kichiklitish. Xitayda ötken yildila nechche ming qétim déhqanlarning naraziliq namayishliri kötürülgen idi. Nöwette bu ehwal xitayning muqimliqigha tesir körsitiwatqan muhim bir amil bolup qaldi.

Wén jyabaw yighinda yene chiriklik mesilisinimu alahide tilgha élip, hökümet emeldarliri arisidiki chiriklikni teltöküs yoqutush iradisini otturigha qoydi. (Peride)