Xitay siyasiy meslihet kéngishining memliketlik yighini teywen hökümitini agahlandurdi

Xitay siyasiy meslihet kéngishining memliketlik yighini ikki heptilik xizmitini xulasilighandin kéyin düshenbe küni yépilghanliqini jakarlidi. Yighinning axirqi küni wekiller qarar maqullap, teywen da'irilirige hujum qildi we teywenni agahlandurdi.

Siyasiy kéngesh yighini qararida, "yéqinqi yillardin béri teywen da'irilirining rehberliri 'teywen musteqilliqi' ni teshebbus qilidighan bölgünchi heriketlerning qedimini tézlitip, atalmish 'asasiy qanunni' özgertish yoli bilen 'teywenni qanuni jehettin' musteqil qilish nishanigha yetmekchi boliwatidu" dep körsetti.

Qararnamida chén shüybyen hökümitining yéqinda yolgha qoyghan "döletni birlikke keltürüsh programmisi" din waz kechkenlikini teywen musteqilliqi yolidiki xeterlik qedem, dep atighan. Qararnamida teywen hökümiti "döletni birlikke keltürüsh komitéti we programmisini mejburiy toxtitip, 4' ni ret qilish, birge yol qoymasliq' toghrisida bergen wedisini inkar qilish bilen xeterlik bir qedem atti " deydu. Qararnamida, " biz buninggha qattiq ghezeplen'genlikimiz we jiddiy diqqet qilidighanliqimizni bildürimiz " dep körsetti. Shuning bilen birge teywenliklerni ikki qirghaq munasiwitini tinch we muqim yüzlinishke qarap ilgiri sürüshke chaqirghan.

Xitay hökümiti teywen musteqiliq jakarlisa qoralliq hujum qozghaydighanliqini agahlandurmaqta. Xitay dölet re'isi xu jingtaw shenbe küni yuqiri derijilik herbiy ofitsirlarni qobul qilip," aldimizdiki 5 yil armiyini zamaniwiylashturush yolidiki muhim dewr bolup qalidu, dep tekitligen.(Erkin)