Teywen prézidénti chén shüybyen teptish da'irilirining eyiblishini ret qildi

Teywen prézidénti chén shüybyen yekshenbe küni wezipisidin istipa bérishni ret qilip, teywen teptish da'irilirining u we uning ayali heqqidiki eyiblishi ni qobul qilmaydighanliqini bildürdi.

Teptish da'iriliri chén shüybyen we uning ayali wu shujénni teywen diplomatiye alahide fondining pulini özining qiliwélish bilen eyiblimekte. Chén shüybyen, yekshenbe küni téléwiziye nutuqi élan qilip, teptish da'irilirining su'al - soriqi we tekshürüshini qobul qilidighanliqini bildürdi. U, "méning yoshurudighan hich nersem yoq," deydu. Chén shüybyen, wezipisidin istipa bérish chaqirighini ret qilip, "eger sotchi méning xiyanetchilikke chétilip qalghanliqimni qarar qilsa, istipa bérishke teyyarmen, dep körsetti.

Teywen teptish da'iriliri jüme küni chén shüybyenning xanimi wu shüyjénni omumning pulini özining qiliwélish, yalghan höjjet yasash, yalghan guwahliqtin ötüsh bilen eyibligendin kéyin, teywen parlaméntidiki öktichi partiyiler chén shüybyenni aghdurush herikitini kücheytti. Uni aghdurush niyitidiki partiyiler buni bir purset, dep qarimaqta.

Wu shüyjén 2002 - yildin 2005 - yilghiche teywen diplomatiye alahide fondining 450 ming dollar pulini özining qiliwélish bilen eyiblen'gen. Teptish da'irliri chén shüybyenning bu setchilikke chétilip qalghanliqini ilgiri sürgen bolsimu, lékin uning wezipide olturghan waqit ichide kechürüm qilinish hoquqi bar. Lékin chén shüybyen, teptish da'irilirige diplomatiye alahide fondining ishlitish yolini chüshendüridighanliqini bildürdi. (Erkin)