Бурун тәйвәндә тилға елиниш чәкләнгән "йигирмә сәккизинчи феврал вәқәси" бүгүн тилға елинди

Б б с ниң хәвәр қилишичә, бүгүн тәйвәндә "йигирмә сәккизинчи феврал вәқәси" музийи ечилған. "Йигирмә сәккизинчи феврал вәқәси" гә 60 йил тошқан бүгүнки күндә, тәйвән президенти чен шуйбйән мәзкур музейиниң ечилғанлиқи мунасивити билән қилған сөзидә, "йигирмә сәккизинчи феврал вәқәси" үчүн әйни вақиттики хитай рәииси җаң кәйшиниң қануни җавабкарлиқини сүрүштүрүш лазимлиқини тәкитлигән.

Бирләшмә агентлиқиниң хәвәр қилишичә, хитайниң гоминдаң армийиси 1947 ‏- йили 2 ‏- айниң 28 ‏- күни тәйвәндә, ишғалийәткә қаршиилиқ көрсәткән он миңлиған тәйвәнликни қораллиқ қирған, түрмигә алған вә шуниңдин тартип тәйвәнни мустәбит түзүм астида идарә қилишқа башлиған. Бу вәқәни тәйвәнликләр "йигирмә сәккизинчи феврал вәқәси" дәп атайду.

Америка авазиниң хәвәр қилишичә, чен шуйбйән бүгүн қилған сөзидә "бурун тәйвәндә мустәбит түзүм йүргүзгән кишиләр вә гуруһларниң көпинчиси сирттин кәлгәнләр. Әгәр һазир тәйвән хәлқиниң әркинлик вә демократийә арзуйини ишқа ашуруш үчүн бурун хәлққә қирғинчилиқ қилған кишиләрниң җинайитини сүрүштүрүши "бир қисим кишиләргә зиянкәшлик қилғанлиқ" дәп қаралса, бу һәқ билән наһәқни астин -үстүн қилғанлиқ болиду" дегән. (Вәли)