Démokratiye tüzümi mustebit tüzümni özgertelemdu?


2008.01.18

Xelqning zulum chékishi yaki zulum chekmesliki ijtima'iy tüzümge baghliq, mustebit tüzümdiki dölette xelq erkinliktin, kishilik hoquqidin mehrum qaldurilidu, mustebitler bolsa özining ornini mustehkemleshni oylaydu, xelq bolsa mustebit tüzümni we mustebitlerni özgertishni oylaydu. Özgertish mumkinmu? bu mesile xelq ichide mulahize qiliniwatqan bir muhim téma.

Töwende muxbirimiz weli bu mesile toghrisida amérikidiki doktor qahar baratning we teywendiki siyasiy obzorchisi lin bawxu'a ependining bu heqtiki mulahizilirini anglitidu.

Démokratiye tüzümi mustebit tüzümni özgertelemdu?

Intérnét tor betliridiki uchurlardin melum bolushiche, xitay hökümiti hazir qandaq qilip özining mustebitlik ornini mustehkemleshni oylaydu, xelq bolsa mustebit tüzümni we mustebitlerni qandaq qilip özgertishni oylaydu. Mustebit tüzümni qandaq özgertish mesilisi hazir xelq ichide mulahize qiliniwatqan bir muhim téma.

Mustebitler özi özgermey öldi, emma bezilirining ewladliri özgerdi, bezilirining ewladliri téxi özgermidi

Amérikida turuwatqan doktor qarar baratning bayan qilishiche, mustebitler bir ömür özgermey öldi. Mesilen :stalin, mawzédong, jangkeyshiler bir ömür mustebitliktin qol üzmey öldi. Emma jang keyshining oghli özgerdi, bu özgirish amérikidin ibaret démokratik döletning tesiride barliqqa keldi.

Maw zédong bilen jang keyshining her ikkilisi mustebit, emma bu ularning tutqan yoli oxshimaydu. Ularning ömri bashtin -axir bir-biri bilen hoquq taliship, öz-ara hayat-mamatliq kürishi qilip ötti. Mawning tutqan yoli kommunizm yoli, jang ning egeshken yoli démokratiye yoli. Jangning hakimiyiti chirikleshken, shunglashqa u meghlup boldi, emma u amérikining démokratik sistémisida turghanliqtin, teywen asta- asta démokratik döletke aylandi.

Mustebitlerning tesirining tügesh-tügimesliki shu dölette qandaq tüzüm yolgha qoyulishi bilen munasiwetlik

Doktor qahar baratning qarishiche, mustebtlerning tesiri tügesh yaki tügimesliki, shu döletning tüzümi kéyinki waqitta qaysi tüzümge yaki qaysi yönilishke qarap méngishi bilen munasiwetlik. Maw özining ewladlirini kommunizm tüzümide qaldurdi, shunglashqa mawning ewladlirida héchqandaq özgirish bolmidi. Jang ölgendin kéyin, teywende démokratik tüzüm téz ewj alghanliqi üchün uning tesiri téz tügidi.

Mustebit tüzümning özgirishi shara'it bilen we chet döletning bésimi bilen munasiwetlik

Erkin asiya radi'osining obzorchisi, hazir teywende turuwatqan siyasiy mulahizichi lin bawxu'aning tehlil qilishiche, mustebit tüzümning özgirishi we tesirining yoqilishi shara'it bilen we chet döletning bésimi bilen munasiwetlik. Teywende jang ning ewladliri özgergenliki we chong quruqluqta mawning ewladliri hazirghiche téxi özgermigenliki, bu yolgha qoyuliwatqan tüzüm bilen, shara'it bilen munasiwetlik. Mawning ewladlirini hazir kommunist partiyining mustebit hakimiyiti qollaydu, ularni muhim orun'gha qoyuwatidu.

Lin bawxu'aning bayan qilishiche, jang ning oghli jang jin'go özgerdi, u démokratiye tüzümi astida qalghan qalghan idi, bolupmu, amérika jongxu'a min'go bilen diplomatik munasiwetni üzgendin kéyin, qattiq oylashqa mejbur boldi, bésimgha duch keldi. Gomindang yoqulushqa yüz len'genlikini hés qildi. U bundaq haletni özgertish üchün teywenlik yerlik xelqqe ehmiyet bérip, ularning hémayisige ige bolup, teywende turup qélish yoligha mangdi. Uningdin burun chong quruqluqqa qaytidin hujum qilip qaytip kétish xiyalida bolghan idi. Shuning bilen 'teywenning namini kötürüp chiqishqa we gomindangni teywenleshtürüshke bashlidi. Bu waqitta, gerche gomindangning menpe'etlirige érishken guruhlar ning )chong quruqluqtin kelgenlerning( qarshiliqigha uchrighan bolsimu, emma yenila teywenning yerlik küchlirining ösüp yétilishige qarita qoyulghan cheklimini boshatti.

Lin bawxu'aning bayan qilishiche, jang keyshining 3 ‏- we 4 ‏- ewladlirida özgirish téximu chong boldi. Ular teywenning yerlik küchliri yétishke bashlighanda, teywende imtiyazdin qélip, kanadagha köchüp ketken idi. Dewrning ötüshi bilen, ular démokratik döletlerde terbiye kördi, bara-bara jang keyshige toghra qaraydighan boldi, hetta xelqning teywenni jang keyshidin xali qilish, jang heykellirini chéqish, jesitini yötkesh toghrisidiki teklipinimu qollidi. Mana bu muhitning tesiri. Chet'elning bésimi. Gitlér fashizimini we yapon militariziminimu özgertip démokratik döletke aylandurushni amérika orunlimidimu!

Mustebitlerning tesiridin qutulush chetning tesirisiz wujutqa kelgen yene bir misal bar

Lin bawxu'aning éytishiche, mustebitlerning ewladliri chet'ellerning bésimi yaki tesiri bolmighan shara'ittimu özgergen misallar ar. Mesilen, stalinning qizi. Stalinning wehshiliki, hetta özining xotunighimu rehimsizlik qilghanliqi , stalinning öz qizinimu qattiq yirgéndürgen. Stalinning qizi dadisining qilmishidin yirginip mustebitke qarshi turush yoligha mangghan. U chet' ellerge kélip terbiye körgendin kéyin, mustebitlikke qarshi turushta téximu qet'iyleshken. Emma mawning ewladlirini xitaydiki hazirqi mustebit tüzüm yölewatidu, imtiyaz bériwatidu. Shunglashqa ular özgermeywatidu.

Mustebit wang léchü'enning towlighan shu'ari bilen közligen meqsiti tamamen özgiche lin bawxu'a ependi wang léchü'en heqqidimu tehlil yürgüzdi. Uning bayan qilishiche, mustebitlerning towlighan shu'ari bilen közligen meqsiti tamamen özgiche. Shinjangda kommunist partiyining eng sadiq ghalchisi wangléchü'endek yuqiri mensebke érisheligen adem yoq bolsa kérek. U 'dölet menpe'etini birinchi orun'gha qoyush' shu'arini towlap kéliwatidu. Wang léchü'en mushu shu'ar astida, yerlik xelqni qanche rehimsizlik basturghanséri, kommunist partiye uning mensipi shunche östüriwatidu. Emeliyette uning 'dölet menpe'etini birinchi orun'gha qoyush' dégini yalghan. Maliye gézitide ashkarilinishiche, shendongdiki dölet igilikidiki eng chong énérgiye shirkiti bolghan 'lunéng shirkiti' ning 70 milyard yu'enlik mülkini üch kishi 30 milyard yu'en'ge sétiwalghan. Ehwalni bilidighan kishilerning pash qilishiche, uni sétiwalghuchining biri zing chingxongning, yene biri wang léchü'enning a'ilisi. Démek wang léchü'enning 'dölet menpe'eti' dégen shu'ar astida özige bayliq toplawatqini ras. (Weli)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.