Teywen herbiy manéwirda awazdin tiz uchidighan bashqurulidighan bombisini namayen qildi

• Muxbirimiz jümening bu heqtiki toluq melumati
• Download story audio

Teywen parlaméntida köp sanliq orun teywendiki milletchi partiye‏ - gomindang partiyisining qoligha ötkendin kéyin gomindang partiyisining rehbiri ma yingjyu eger bu yil 3- ayda ötküzilidighan prézidéntliq saylimida ghelibe qilip prézidént bolup saylinip qalsa , xitay bilen teywen arisida biwaste qatnaydighan yoluchilar ayropilanigha yol achidighanliqini we xitay bilen bashqa munasiwetlerni kücheytish toghrisida öz meydanini ipadiligen idi.

Halbuki , teywen dölet siyasitide chong özgirishler bolush éhtimalliqi tughuluwatqan we közetküchiler arisida teywen musteqilliq ghayisidin waz kechken oxshaydu dégendek shübhilik pikirler meydan'gha kéliwatqan peytlerde , teywende dölet mudapi'esini kücheytish we xitayning teywen boghuzida barghanche kücheytiwatqan herbiy tesirige ünümlük taqabil turush üchün teywen da'iriliri bashqurulidighan bomba téxnikisini téximu ilgharlashturush we hawa, déngiz we quruqluqtin ibaret üch xil armiyisining birlikte jeng qilish iqtidarini ashurup, xitay azadliq armiyisining hujumigha inkas qayturush sheklidiki her xil teyyarliq xizmetlirini kücheytken bolup, bügün teywende ötküzülgen shu xildiki bir herbiy manéwir buning tipik misalidur .

Mezkur bombining étish ariliqi 200 kilo métir bolup chong tipitiki herbiy paraxotlar etritige zerbe bérish iqtidarigha ige

23-24- Yanwar künliri teywen dölet mudapi'e ministirliqi, üch xil armiye birlikte ishtirak qilghan ikki kunluk bir herbi manéwir ötküzgen bolup, amérika awazi radi'osining tehlilchilerning éytqanliridin neqil élip körsitishiche, teywen armiyilirining hemkarliship jeng qilish iqtidari diqqetni alahide tartidighan bolup, teywen bu xilidiki manéwir arqiliq özining herbiy téxnikini yaxshilashni meqset qilghan . Uningdin bashqa, teywen bu nöwet ötken yili yasap chiqqan bashqurulidighan bombilirini sinaq qilish basquchigha kirgenlikidin bisharet bergen.

Teywen ötken yilidiki dölet bayrimida, özi tetqiq qilip yasap chiqqan awazdin tiz uchidighan shyungféng ( dehshetlik boran) 3 tipliq bashqurulidighan bombisini parattin ötküzgen. Melum bolushiche, mezkur bombining étish ariliqi 200 kilo métir bolup chong tipitiki herbiy paraxotlar etritige zerbe bérish iqtidarigha ige iken.

Amérika awazida teywen déngiz armiye paraxot etriti qomandanliq shtabining mudiri lyu rénjining éytqanlirini neqil élip körsitishiche, u hazir shyungféng 3 tipliq bashqurulidighan bombilarning teywenning gaw shyung rayonidiki ong qanat herbiy portigha jaylashqan muwappeqiyet aliy derijilik charlighuchi paraxotlirigha seplinip bolghanliqini , hazir sinaq qilish basquchigha ötkenlikini bildürgen.

Teywen quruqluq we hawa armiyilirining jeng qilish iqtidari xitayningkidin nechche hesse üstün

Xewerde körsitishiche, manéwirning ikkinchi küni yeni peyshenbe küni, gawshyungdiki sol qanat herbiy portida déngiz yüzide su asti paraxotlirigha qarshi turush manéwiri élip bérilghan bolup, buningda teywenning hujumchi , qoghdighuchi, su minasi tazilighuchi we bashqurulidighan bomba orunlashturulghan tiz sür'etlik katér we su asti paraxotigha qarshi tik uchar qisimliridin ibaret qisimlarning masliship jeng qilish iqtidarini namayen qilghan bolsa, birinchi künidiki manéwirda gawshyung bazidiki quruqluq qisimliri bronéwikchilar qisimi 564 brigadisi xitay azadliqi armiyisining tuyuqsiz hujumigha qarshi turush meshiqi élip barghan. Buningda teywen özi yasap chiqqan bronéwik we tik uchar we zembireklerni ishqa salghan.

Dölet mudapi'e teqrizi ayliq zhurnilining bash muherriri pinokofning amérika awazigha bildürüshiche, teywenning quruqluq qisimlirining qoralliri bir az qalaq bolup, emma quruqluq we hawa armiyilirining masliship jeng qilish iqtidari xitay azadliq armiyisiningkidin nechche hesse üstün we urush meydanning ehwalini kontrol qlish iqtidari intayin küchlük iken.

Derweqe, b b s da körsitishiche, teywen dölet bixeterliki kéngishining bash katipi ké chéngxéng, hazir xitay teywen boghuzida su asti herbiy paraxotlirining pa'aliyiti qétim sanini köpeytish arqiliq teywenni " xitay déngiz tewesidiki rayon" gha aylandurush meqsitining barghanche ashkariliniwatqanliqini, shunga teywenning öz aldigha bashqurulidighan bomba téxnikisini yéngilap xitayning ighwagerchilikige taqabil turushi kéreklikini bildürgen.

Ké chéngxéng yaponiyining "tijaret xewerliri" axbarat agéntliqining ziyaritini qobul qilghanda, xitay paraxot etretlirining yaponiye, teywen we sin'gapor aralliri tizmiliridin ötüsh qétim sanining barghanche köpeygenlikini, bu 1990- yillardiki yilgha bir yaki ikki qétim bolghan bolsa ötkenki ikki yil mabeynide 5- 6 qétimgha yetkenlikini körsetken.

U xitay su asti paraxotlirining heriket da'irisini öz chégirisi sirtidiki okyanlarghiche kéngeytishidiki meqsetning eger teywen boghuzida jiddiy ehwal yuz bergen peytte, amérika awi'amatka etiritining yardemge kélishini cheklesh ikenlikini bildürgen.

Sherqi asiya tehlilchisi doktur erkin ekremning bildürüshiche, teywenning hazirqi herbiy küchi xitay azadliq armiyisining hujumlirini ünümlük tosush we ghelibe qilish iqtidarigha ige bolsimu, emma xitay bilen uzun muddet jeng qilishqa qurbi yetmeydiken.

Teywen mudapi'e we qayturma hujum iqtidarini östürüshi kérek

Ké chéngxéng, teywenning amérika herbiy qisimlirining yardemge kélishini kütüp turalmaydighanliqini, shunga teywen choqum bashqurulidighan bomba, radar we herbiy ayrodrom téxnikilirini ilgharlashturup, mudapi'e we qayturma hujum iqtidarini östürüshi kérek ikenlikini otturigha qoyghan.

U yene , teywenning iqtisadi jehette xitay bilen xéli chongqur munasiwetke ige bolsimu , emma bixeterlik jehette xewpsireydighanliqini, xitayning her zaman tuyuqsiz hujum qélishigha taqabil turush üchün özining herbiy iqtidari we qoral-yaraqlirining téxnikisini yéngilashqa mejbur ikenlikini otturigha qoydi.

U yene shu sewebtin teywenning her yili shu xildiki téxnikilarni yéngilashqa köp kuch serp qilidighanliqini we herbiy manéwirlarni bir-ikki qétim ötküzup turidighanliqini hemde xitaygha "bizningmu herbiy küchimiz bar" dégen uchurni yetküzüshni meqset qilidighanliqini körsetti.

Hazir teywen 3 herbiy bazisigha amérikining "wetenperwer 2 tipliq " bashqurulidighan bomba séstimsini orunlashturghan bolup, teywen yene amérikining "wetenperwer 3 tipliq" bombisini sétiwélishqa térishiwatidu.

Uningdin bashqa 2007- yili 9- ayda amérika terep teywen'ge 12 dane p k3 tipliq razwétka ayropilani sétip bérishke qoshulghan bolup, mutexessislerning birdek qarishiche, teywen bu qorallargha érishkendin kéyin , özining xitay azadliq armiyisige zerbe bérish we uninggha qarshi qayturma hujumgha utush iqtidarini ünümlük östüreleydiken.