Teywen quruqluq armiyisi généralining yaponiye ziyariti, jonggu da'irilirining naraziliqini qozghidi

Yaponiye da'irilirining teywen quruqluq armiyisi généralini yaponiyide ötküzülgen herbiy maniwirgha teklip qilishi, jonggu hökümitining qattiq narazliqini qozghidi.

Royétiris agéntliqi 25 ‏- awghust küni, jonggu tashqi ishlar ministirliqining bayanatchisi lyu jenchawning sözini neqil keltürüp": yaponiye hökümitining, teywen quruqluq armiyisining générali xu jénpuni yaponiyige teklip qilishi, jonggu yaponiye munasiwitige éghir derijide dexli yetküzüdu" dédi.

Lyu jenchaw sözide yene yaponiyining, jonggu yaponiye otturisida maqullan'ghan, üch xil siyaset höjjitining prinsip we ehdinamilirigha xilap heriket élip barghanliqidin qattiq narazi bolghanliqini tekitlidi.

Bayanatchi lyu jenchaw, yaponiye hökümitining emiliy herikiti arqiliq, bir jonggu pirinsipigha hörmet bildürishi kéreklikini, shuningdek bundin kéyin bundaq weqening qayta sadir bolushining aldini élishi kéreklikini bildürdi.

Yaponiye metbu'atlirida, teywen quruqluq armiyisi généralining 24 ‏- awghust küni, yaponiyde élip bérilghan chong kölemlik herbiy manéwirni közdin kechürgenliki élan qilin'ghan bolup, manéwirgha mes'ul xadimlarning éytishiche, mezkur manéwir ashkare ötküzülgenliki üchün, manéwirni közdin kechürgüchilerning éniq salahiyti békitilmigen iken. (Qanat)