Teywen dölet mudapi'e ministiri xitaydin kélidighan 10 chong tehditni qiyas qildi

Teywen dölet mudapi'e ministirliqi yéqinda , teywen dölet turghuzush mehkimisige doklat sunup, teywen dölet birliki komitéti we programmisini bikar qilghandin kéyin, xitay herbiy terepning kelgüside 10 xil usulda teywen'ge herbiy tehdit ishlitishi mumkinlikini otturigha qoydi.

Doklatta xitayning, teywen boghizining bir qisim jaylirini taqash, qerellik halda urush ayrupilanliri bilen teywen boghizini charlash yaki atom bombisini sinaq qilish, xitay ayrupilanliri yaki paraxotlirini ikki qirghaq arisidiki ottura siziqtin halqitish hetta alahide qisim etretliride teywen rehberlirini süyqest qilip öltürüsh meshqlirini élip bérishqa oxshash bir yürüsh usullar bilen teywen hökümitining iradisige tehdit qilishi mumkinliki körsitilgen.

Dölet mudapi'e ministiri doklatida yene, "xitay hökümiti teywen'ge qaritilghan herbiy meshqlerni köpeytip, yéngi tiptiki qorallirini körsitish arqiliq weziyetni jiddiyleshtürishi mumkin. Hetta ishpyonlarni sélish we kompyutér qara méhmanliri arqiliq teywen hakimiyitige ziyankeshlik qilishi mumkin" dep yazghan.

Dölet mudapi'e ministirliqining bu doklatigha qarita qanun turghuzush mehkimisidiki gomindangchilar guman bilen qarap, bu doklatni bir az mubalighe qiliwétilgen dep körsetti. Teywen dölet mudapi'e ministiri li jyé gerche hazir xitayning teywen'ge qarita binormal herikiti körülmisimu, lékin teywenning her da'im urushning aldini élishqa teyyar turushi we bu jehettiki hushyarliqni yuqiri kötirishi zörürlikini éytti. (Peride)