ئامېرىكا: خىتاينىڭ قورال - ياراقلار كېڭەيمىچىلىكى دۇنياغا تەھدىت

• 
  2006-09-15

ئامېرىكا ئەمەلدارلىرى خىتاينى لۈكچەك دۆلەتلەرگە خالىغانچە قورال - ياراق ساتماقتا، دەپ ئەيىبلىدى ۋە خىتاي بىئو - خىمىيىلىك قوراللارنى تەرەققى قىلدۇرۇۋاتىدۇ، دەپ گۇمانلىنىدىغانلىقىنى بىلدۈردى.

ئامېرىكا ياردەمچى دۆلەت مۇداپىئە مىنىستىرى پېتىر رودمان، خىتاينىڭ بۇ ھەرىكىتى بۇرنىنىڭ ئۇچۇنىلا كۆرگەنلىك، دەپ تەنقىدلىگەن. رودمان، پەيشەنبە كۈنى ئامېرىكا دۆلەت مەجلىسىنىڭ خىتاي - ئامېرىكا ئىقتىسادى ۋە بىخەتەرلىك كۆزىتىش كومىتېتىدا گۇۋاھلىق بېرىپ، خىتاينىڭ شىمالىي كورىيە ۋە ئىرانلار بىلەن بولغان مۇناسىۋىتىنى قايتا كۆزدىن كەچۈرۈشكە چاقىردى ۋە بۇ دۆلەتلەرگە خالىغانچە قورال - ياراق ساتماسلىقنى تەلەپ قىلدى. ئۇ، "خىتاينىڭ ھەرىكىتى يىراقنى كۆرەلمىگەنلىك ۋە خەتەرلىك " دەيدۇ.

يىغىندا، ئامېرىكا ياردەمچى تاشقى ئىشلار مىنىستىرى پائۇلا دﯤ ساتتېر، ئامېرىكىنىڭ خىتايدىن "كۆپ خىل ئىقتىدارغا ئىگە" بىئو-خىمىيىلىك قوراللارنى تەرەققى قىلدۇرۇۋاتىدۇ، دەپ گۇمانلىنىدىغانلىقىنى ۋە خىتاينىڭ قىرغۇچى قوراللارنى كونترول قىلىش ۋەدىسىگە ئەمەل قىلىش سەمىمىيىتىدىن گۇمانلىنىدىغانلىقىنى بىلدۈردى.

ئۇ، "بىز خىتاينىڭ قورال - ياراقلارنىڭ كېڭىيىشىگە تۇتقان مۇئامىلىسىدىن ئۈمىدسىزلىنىۋاتىمىز شۇنداقلا خىتاي ھۆكۈمىتىنىڭ قىرغۇچى قوراللارنى كونترول قىلىش مەسىلىسىدىكى مەسئۇلىيەتچانلىقىدىن ئەنسىرەۋاتىمىز " دېدى. ئامېرىكا بۇرۇن ئىرانغا ھەربىي تېخنىكا ساتقان بەزى خىتاي شىركەتلىرىنى جازالىغان. (ئەركىن)