Америка: хитайниң қорал - ярақлар кеңәймичилики дуняға тәһдит

Америка әмәлдарлири хитайни лүкчәк дөләтләргә халиғанчә қорал - ярақ сатмақта, дәп әйиблиди вә хитай био - химийилик қоралларни тәрәққи қилдуруватиду, дәп гуманлинидиғанлиқини билдүрди.

Америка ярдәмчи дөләт мудапиә министири петир родман, хитайниң бу һәрикити бурниниң учунила көргәнлик, дәп тәнқидлигән. Родман, пәйшәнбә күни америка дөләт мәҗлисиниң хитай - америка иқтисади вә бихәтәрлик көзитиш комитетида гуваһлиқ берип, хитайниң шималий корийә вә иранлар билән болған мунасивитини қайта көздин кәчүрүшкә чақирди вә бу дөләтләргә халиғанчә қорал - ярақ сатмаслиқни тәләп қилди. У, "хитайниң һәрикити йирақни көрәлмигәнлик вә хәтәрлик " дәйду.

Йиғинда, америка ярдәмчи ташқи ишлар министири паула де саттер, америкиниң хитайдин "көп хил иқтидарға игә" био-химийилик қоралларни тәрәққи қилдуруватиду, дәп гуманлинидиғанлиқини вә хитайниң қирғучи қоралларни контрол қилиш вәдисигә әмәл қилиш сәмимийитидин гуманлинидиғанлиқини билдүрди.

У, "биз хитайниң қорал - ярақларниң кеңийишигә тутқан муамилисидин үмидсизлиниватимиз шундақла хитай һөкүмитиниң қирғучи қоралларни контрол қилиш мәсилисидики мәсулийәтчанлиқидин әнсирәватимиз " деди. Америка бурун иранға һәрбий техника сатқан бәзи хитай ширкәтлирини җазалиған. (Әркин)