Amérika: xitayning qoral - yaraqlar kéngeymichiliki dunyagha tehdit

Amérika emeldarliri xitayni lükchek döletlerge xalighanche qoral - yaraq satmaqta, dep eyiblidi we xitay bi'o - ximiyilik qorallarni tereqqi qilduruwatidu, dep gumanlinidighanliqini bildürdi.

Amérika yardemchi dölet mudapi'e ministiri pétir rodman, xitayning bu herikiti burnining uchunila körgenlik, dep tenqidligen. Rodman, peyshenbe küni amérika dölet mejlisining xitay - amérika iqtisadi we bixeterlik közitish komitétida guwahliq bérip, xitayning shimaliy koriye we iranlar bilen bolghan munasiwitini qayta közdin kechürüshke chaqirdi we bu döletlerge xalighanche qoral - yaraq satmasliqni telep qildi. U, "xitayning herikiti yiraqni körelmigenlik we xeterlik " deydu.

Yighinda, amérika yardemchi tashqi ishlar ministiri pa'ula dé sattér, amérikining xitaydin "köp xil iqtidargha ige" bi'o-ximiyilik qorallarni tereqqi qilduruwatidu, dep gumanlinidighanliqini we xitayning qirghuchi qorallarni kontrol qilish wedisige emel qilish semimiyitidin gumanlinidighanliqini bildürdi.

U, "biz xitayning qoral - yaraqlarning kéngiyishige tutqan mu'amilisidin ümidsizliniwatimiz shundaqla xitay hökümitining qirghuchi qorallarni kontrol qilish mesilisidiki mes'uliyetchanliqidin ensirewatimiz " dédi. Amérika burun iran'gha herbiy téxnika satqan bezi xitay shirketlirini jazalighan. (Erkin)