Xitay xelq qurultiyi, xitay- pakistan térrorluqqa qarshi kélishimini maqullidi

Xitay xelq qurultiyi pakistan bilen xitay otturisida atalmish üch xil küchlerge yeni térrorchiliq, bölgünchilik we diniy esebiylikke qarshi turush toghrisida imzalan'ghan kélishimni maqullidi.

Shinxu'a agéntliqining xewer qilishiche, xitay xelq qurultiyi, xitay hökümiti bilen pakistan otturisida 2005‏- yili april éyida imzalan'ghan mezkur kélishimni 27‏- awghust küni maqullighan.

Xewerde éytilishiche, pakistan bilen imzalan'ghan bu kélishim, xitay hökümiti 2001‏- yili qazaqistan, qirghizistan, tajikistan we özbékistan qatarliq shangxey hemkarliq teshkilatigha eza döletler bilen imzalighan kélishimni toluqlaydighan bir kélishim hésablinidiken.

Xewerlerge qarighanda, xitay hökümiti Uyghur aptonom rayonidiki bölgünchilik herikitini, xitayning muqimliqi üchün eng jiddiy tehdit dep qarap, Uyghur musteqilchilirining qoshna döletlerdiki bolupmu Uyghurlar bir qeder köp orunlashqan döletlerdiki pa'aliyetlirining aldini élish üchün mezkur döletler bilen atalmish üch xil küchlerge yeni térrorchiliq, bölgünchilik we diniy esebiylikke qarshi turush nami astida köp tereplime kélishimler imzalimaqta.

Siyasi mulahizichiler, xitayning bu jehette, shangxey hemkarliq teshkilatidin paydiliniwatqanliqini, özining nöwettiki iqtisadiy we siyasiy küchini ishqa sélip, shangxey hemkarliq teshkilatigha eza döletlerni xitayning xahishi boyiche qararlar élishqa zorlawatqanliqini bildürmekte.

Fransiye agéntliqining xewer qilishiche, xitay tashqi ishlar yardemchi ministiri wu dawéy béyjingda bergen bayanatida, üch xil küchler pakistan xelqining hemde pakistanda ishlewatqan we yashawatqan xitay puqralirining hayatini tehdit qilmaqta, shunga xitay bilen pakistan otturisida bundaq bir kélishimning imzalinishi kéreklik idi, dégen. (Qanat)