Хитай ғәрб мәтбуатлириниң тәнқидигә инкас қайтурди


2007.01.16
Share on WhatsApp
Share on WhatsApp

16 ‏- январ үни, тәңритағ тор бетидә бейҗиңда нәшир қилинидиған "йәр шари вақит гезити" ниң мухбири чин гаңниң "памир игизликидики һәрби - хәлқ һәмкарлишип террорчи күчләргә зәрб бериватқанлиқиға шаһид болдум" дегән темидики мақалиси бесилди.

Мәзкур мақалида, 18 нәпәр террор гумандариниң хитай сақчилири тәрипидин өлтүрүлүп, 17 кишиниң тутулғанлиқини қайта тәкрарлиған болсиму, вәқә йүз бәргән җайларни йәнила ениқ испатлиялмиған.

Хитай һөкүмити йеқинда 18 нәпәр террор гумандариниң хитай сақчилири тәрипидин өлтүрүлүп, 17 кишиниң тутулғанлиқини җакарлиғандин кейин, америка, әнгилийә вә франсийә қатарлиқ ғәрб мәтбуатлирида "өлтүрүлгән вә қолға елинған террор гумандарлири бәлким канчи яки шәхси қурал -ярақ сатқучилар болуши мумкин, шуңа бу һәқтә чоңқурлап тәкшүрүш елип берилмай туруп, аддий һөкүм чиқирилмаслиқи керәк" дегәндәк тәнқидий пикирләр оттуриға қоюлған.

Тәңритағ тор бетидә елан қилинған бу мақалида, ғәрб мәтбуатлириниң бу хил тәнқидигә қаттиқ инкас қайтурулған болуп, "ғәрб мәтбуатлириниң бизни бундақ әйибләш һоқуқи йоқ. Уларниң әйиблиши хәлқара террорлуққа қарши туруш вәзийитигә уйғун кәлмәйду" дәп көрситилгән.

Мәзкур мақалида аптор чингаң йәнә памир игизликидики уйғурларниң терроризмға қарши турушта, йәрлик һәрбийләр билән қандақ һәмкарлашқанлиқини гәвдиләндүрүшкә тиришқан. (Меһрибан)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.