خىتاي بېيجىڭ ئولىمپىك ھەرىكىتى تېررور تەھدىتىگە دۇچ كېلىۋاتقانلىقىنى بىلدۈرمەكتە


2007.09.11
Share on WhatsApp
Share on WhatsApp

خىتاي جامائەت خەۋپسىزلىك مىنىستىرى جۇ يۇڭكاڭ دۈشەنبە كۈنى بېيجىڭدا ئۆتكۈزۈلگەن بىر قېتىملىق بىخەتەرلىك يىغىنىدا، تېررورچىلىق كېلەر يىلى بېيجىڭدا ئۆتكۈزۈلىدىغان ئولىمپىك تەنھەرىكەت يىغىنى ئۈچۈن ئەڭ چوڭ تەھدىت دەپ كۆرسەتكەن ھەمدە ئېلىپ بېرىلغۇسى ھۇجۇملارنىڭ ئالدىنى ئېلىش ئۈچۈن، خەلقئارا جامائەتنى تېخىمۇ يېقىندىن ھەمكارلىشىشقا چاقىرغان.

ئامېرىكا بىرلەشمە ئاگېنتلىقىنىڭ خەۋەر قىلىشىچە، خىتاي جامائەت خەۋپسىزلىك مىنسىتىرى جۇ يۇڭكاڭ يېغىندا قىلغان سۆزىدە،" گەرچە بېيجىڭ ئولىمپىك يىغىنى ئۈچۈن بىخەتەرلىك ۋەزىيىتى ئاساسەن تۇراقلىق بولسىمۇ، بىز يەنىلا تېررورچىلىق، بۆلگۈنچىلىك ۋە ئەسەبىي دىنىي كۈچلەرنىڭ قارشىلىق ھەرىكەتلىرىگە دۇچ كەلمەكتىمىز" دېگەن.

مۇتەخەسسىسلەر، بېيجىڭ ئولىمپىك تەنھەرىكەت يىغىنى جەريانىدا تېررورلۇق ھۇجۇمى ئېھتىماللىقىنىڭ ناھايىتى ئاز ئىكەنلىكىنى بىلدۈرمەكتە. لېكىن خىتاي ھۆكۈمىتى ئۇزۇندىن بېرى، ئۇيغۇر ئېلىدە ئۇيغۇر مۇسۇلمانلىرىنىڭ مۇستەقىللىق ھەرىكىتى تەھدىتىگە دۇچ كېلىۋاتقانلىقىنى تەكىتلىمەكتە.

گەرچە خىتاي ھۆكۈمىتى، 2008‏- يىللىق ئولىمپىك تەنھەرىكەت يىغىنى ھارپىسىدا ، تېررورچىلىقنى ئەڭ چوڭ تەھدىت دەپ كۆرسىتىۋاتقان بولسىمۇ، ئەمما خەلقئارا كىشىلىك ھوقۇق تەشكىلاتلىرى خىتايدا ئون يىلدىن بېرى ھېچقانداق جىددىي تېررورلۇق پائالىيىتى يۈز بەرمىگەنلىكىنى، خىتاي ھۆكۈمىتىنىڭ بولۇپمۇ ئۇيغۇرلارغا قاراتقان باستۇرۇش ھەرىكىتىنى خەلقئارا جامائەتكە ھەقلىق كۆرسىتىش ئۈچۈن، تېررورچىلىقنى ھېلىمۇ ئەڭ چوڭ تەھدىت دەپ ئوتتۇرىغا قويۇۋاتقانلىقىنى تەكىتلىمەكتە.

خەلقئارا كىشىلىك ھوقۇقنى كۆزىتىش تەشكىلاتىنىڭ خوڭكوڭدىكى تەتقىقاتچىسى نىكولاس بىكولىننىڭ ئېيتىشىچە، ، خىتاي ھۆكۈمىتى خەلقئارا كىشىلىك ھوقۇق قانۇنلىرىنىڭ قوغدىشى ئاستىدىكى پائالىيەتلەرنىمۇ، تېررورلۇق پائالىيەتلىرى دەپ كۆرسەتمەكتە. (ئەقىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.