Xitay béyjing olimpik herikiti térror tehditige duch kéliwatqanliqini bildürmekte

Xitay jama'et xewpsizlik ministiri ju yungkang düshenbe küni béyjingda ötküzülgen bir qétimliq bixeterlik yighinida, térrorchiliq kéler yili béyjingda ötküzülidighan olimpik tenheriket yighini üchün eng chong tehdit dep körsetken hemde élip bérilghusi hujumlarning aldini élish üchün, xelq'ara jama'etni téximu yéqindin hemkarlishishqa chaqirghan.

Amérika birleshme agéntliqining xewer qilishiche, xitay jama'et xewpsizlik minsitiri ju yungkang yéghinda qilghan sözide," gerche béyjing olimpik yighini üchün bixeterlik weziyiti asasen turaqliq bolsimu, biz yenila térrorchiliq, bölgünchilik we esebiy diniy küchlerning qarshiliq heriketlirige duch kelmektimiz" dégen.

Mutexessisler, béyjing olimpik tenheriket yighini jeryanida térrorluq hujumi éhtimalliqining nahayiti az ikenlikini bildürmekte. Lékin xitay hökümiti uzundin béri, Uyghur élide Uyghur musulmanlirining musteqilliq herikiti tehditige duch kéliwatqanliqini tekitlimekte.

Gerche xitay hökümiti, 2008‏- yilliq olimpik tenheriket yighini harpisida , térrorchiliqni eng chong tehdit dep körsitiwatqan bolsimu, emma xelq'ara kishilik hoquq teshkilatliri xitayda on yildin béri héchqandaq jiddiy térrorluq pa'aliyiti yüz bermigenlikini, xitay hökümitining bolupmu Uyghurlargha qaratqan basturush herikitini xelq'ara jama'etke heqliq körsitish üchün, térrorchiliqni hélimu eng chong tehdit dep otturigha qoyuwatqanliqini tekitlimekte.

Xelq'ara kishilik hoquqni közitish teshkilatining xongkongdiki tetqiqatchisi nikolas bikolinning éytishiche, , xitay hökümiti xelq'ara kishilik hoquq qanunlirining qoghdishi astidiki pa'aliyetlernimu, térrorluq pa'aliyetliri dep körsetmekte. (Eqide)