Xitay térrorchiliqqa qarshi qanun békitmekchi

Merkiziy agéntliqining 16 - iyun teybéydin bergen xewiride éytilishiche, xitay ediliye minisitirliqi qarmighidiki térrorchiliqqa zerbe bérish idarisining bashliqi jaw yongchén "térrorchiliqqa qarshi qanun" békitip, térrorchiliq pa'aliyetlirige qattiq zerbe béridighanliqini bildürgen.

Béyjing kechlik géziti , jaw yongchénning sözini neqil keltürüp mundaq dégen: "dölitimiz yenila térrorchiliqning tehditige duch kelmekte, nöwette sherqiy türkistan térror küchliri bizge nisbeten asasliq térror tehditi hésablinidu. Ötken esirning 90 - yillirida sherqiy türkistanchilar, shinjang chégrisi ichide 200 qétimdin artuq térror weqesi sadir qildi" .

Jaw yongchén sözide yene, özlirining xelq'ara térror küchlirining ziyankeshlikige uchrighanliqini bildürüp, bir qisim xitay puqralirining pakistan we afghanistanda yüz bergen térror hujumining qurbanigha aylanliqini tekitligen.

Mükemmel bolghan "térrorchiliqqa zerbe bérish qanun" ni tiklesh arqiliq, térrorchilargha ejellik zerbe bérish, bolupmu térrorchilarning iqtisadiy menbesini késip tashlash kéreklikini otturigha qoyghan jaw yongchén yene, xelq'ara térrorchiliqqa zerbe bérish teshkilatliri bilen hemkarliqni yenimu kücheytidighanliqini bildürgen.

Biraq, dunya Uyghur qurultiyining ijra'iye re'isi, amérika Uyghur birleshmisining bash katipi alim séyitof ependi, yéqinda "Uyghurlar xitay hökümiti teripidin siqilmaqta" dégen témida maqale élan qilip, xitay hökümitining 11 - séntebir weqesidin kéyin, oydurma pakitlarni yaritish arqiliq, chet'ellerde sherqiy türkistanning siyasiy dawasini élip bériwatqan qanunluq teshkilatlarni qarilawatqanliqini körsetken idi. (Eqide)