Хитай хәлқ қурултийи б д т ниң террорчилиққа қарши туруш әһдинамисини музакирә қилиду

Хитай мәтбуатлириниң хәвәр қилишичә, хитай хәлқ қурултийи бу айниң ахирлири өткүзидиған даими комитет йиғинида, б д т чиқарған террорчилиқниң малийә мәнбәсигә зәрбә бериш әһдинамисини музакирә қилидикән.

Шинхуа ахбарат агентлиқи, террорчилиқниң малийә мәнбәсигә зәрбә бериш хәлқара әһдинамиси хитай хәлқ қурултийи даимий комитетиниң 25 - февралдин 29 - февралғичә давамлишидиған 4 күнлик йиғинида музакиригә қоюлидиғанлиқини билдүрди.

Шинхуа ахбарат агентлиқиниң әскәртишичә, мәзкур әһдинамини мақуллаш мәмликәт сиртидики хитайға қарши күчләрниң мәмликәт ичидики террорчиларни малийә мәнбәси билән тәминлишидин сақлинишқа пайдилиқ икән. Шинхуа ахбарат агентлиқи хитай хәлқ қурултийиниң юқири дәриҗилик бир әмәлдариниң сөзини нәқил кәлтүрүп, " бу җуңгониң террорчилиққа қарши туруш қәтилики вә җуңго хәлқара җәмийәтниң мәсулийәтчан бир әзаси икәнликини намайән қилиш ролини ойнайду" деди. Хитай һөкүмити мәзкур әһдинамиға 2001 -йили 11 - айда имза қойған болсиму, әмма хәлқ қурултийи буни әмди музакиригә қойған.

Шинхуа ахбарат агентлиқи мәмликәт сиртидики хитайға қарши күчләрниң малийә ярдимини алидиған мәмликәт ичидики террорчиларниң кимләр икәнликини тилға алмиған болсиму, әмма көзәткүчиләр бу шәрқий түркистан күчлирини көрситиду, дәп қаримақта. Хитай һөкүмити 11 - синтәбир вәқәсидин кейин шәрқий түркистан күчлирини террорчи, хитайни " террорчилиқниң зиянкәшликигә учриған дөләт" дәп елан қилған. Әмма кишилик һоқуқ тәшкилатлири хитай даирилирини террорлуқни баһанә қилип, уйғурларниң кишилик һоқуқи вә мәдәнийәт кимликигә зәрбә бәрмәктә, дәп әйиблигән иди. (Әркин)