Xitay xelq qurultiyi b d t ning térrorchiliqqa qarshi turush ehdinamisini muzakire qilidu

Xitay metbu'atlirining xewer qilishiche, xitay xelq qurultiyi bu ayning axirliri ötküzidighan da'imi komitét yighinida, b d t chiqarghan térrorchiliqning maliye menbesige zerbe bérish ehdinamisini muzakire qilidiken.

Shinxu'a axbarat agéntliqi, térrorchiliqning maliye menbesige zerbe bérish xelq'ara ehdinamisi xitay xelq qurultiyi da'imiy komitétining 25 - féwraldin 29 - féwralghiche dawamlishidighan 4 künlik yighinida muzakirige qoyulidighanliqini bildürdi.

Shinxu'a axbarat agéntliqining eskertishiche, mezkur ehdinamini maqullash memliket sirtidiki xitaygha qarshi küchlerning memliket ichidiki térrorchilarni maliye menbesi bilen teminlishidin saqlinishqa paydiliq iken. Shinxu'a axbarat agéntliqi xitay xelq qurultiyining yuqiri derijilik bir emeldarining sözini neqil keltürüp, " bu junggoning térrorchiliqqa qarshi turush qet'iliki we junggo xelq'ara jem'iyetning mes'uliyetchan bir ezasi ikenlikini namayen qilish rolini oynaydu" dédi. Xitay hökümiti mezkur ehdinamigha 2001 -yili 11 - ayda imza qoyghan bolsimu, emma xelq qurultiyi buni emdi muzakirige qoyghan.

Shinxu'a axbarat agéntliqi memliket sirtidiki xitaygha qarshi küchlerning maliye yardimini alidighan memliket ichidiki térrorchilarning kimler ikenlikini tilgha almighan bolsimu, emma közetküchiler bu sherqiy türkistan küchlirini körsitidu, dep qarimaqta. Xitay hökümiti 11 - sintebir weqesidin kéyin sherqiy türkistan küchlirini térrorchi, xitayni " térrorchiliqning ziyankeshlikige uchrighan dölet" dep élan qilghan. Emma kishilik hoquq teshkilatliri xitay da'irilirini térrorluqni bahane qilip, Uyghurlarning kishilik hoquqi we medeniyet kimlikige zerbe bermekte, dep eyibligen idi. (Erkin)