Xitay metbu'at teshwiqatini kücheytish arqiliq xitayni xelq'ara jama'etchilikke toghra tonutushni teshebbus qildi

Metbu'at erkinlikini qattiq boghup, chiriklik qatarliq sezgür mesililerni pash qilghan yerlik muxbirlarni türmige tashlawatqan xitay hökümiti, chet'el metbu'atini xitay toghrisida terepsiz xewer bermeywatidu dep eyiblep, mesililer heqqide xelq'ara jama'etchilikke toghra chüshendürüsh bérish üchün bundin kéyin, xitay hökümet mes'ullirining köprek muxbirlarni kütiwélish yéghini ötküzidighanliqini bildürdi.

Xitay hökümiti axbarat idarisining bashliqi sey wu peyshenbe küni béyjingda ötküzgen muxbirlarni kütiwélish yéghinida": tunulghan bezi axbarat wasitiliri teripidin bérilgen xewerler, xitayni körmigen we xitaydiki weziyetni chüshenmeydighan kishiler ning sözliri. Bu axbarat wasitiliri namelum kishiler teripidin bérilgen atalmish höjjetlerge tayinip, xitay heqqide xewer we mulahiziler élan qilmaqta" dégen.

U sözide yen, buning aldini élish üchün kéler yili milliy tereqqiyat we dölet islahat komitéti qatarliq 9 yéngi bölümning, dawamliq chet'el muxbirlirimu qatnashturulghan muxbirlarni kütiwélish yéghini ötküzüp, metbu'at bilen alaqe qurup turidighanliqini bildürdi.

Xitay hökümiti 1‏- yanwardin kéyin, 2008‏- yilliq olimpik ten heriket yéghini harpisida chet'el muxbirlirining pa'aliyetlirige qolayliq yaritip bérish üchün chet'el muxbirlirige bérilgen cheklimlerning köpinchisini waqitliq bikar qilidighanliqini bildürdi. Lékin chet'el muxbirlirining herbiy rayonlarni, Uyghur éli we tibetni ziyaret qilishi heqqidiki cheklime yenila bikar qilinmighan. (Eqide)