Хитай сүний һәмраһи сичүәндики аһалилар райониға чүшүп кәтти

Йәр йүзигә қайтип келиватқан хитай пән тәтқиқат сүний һәмраһи сичүәндики бир аһалилар райониға чүшүп кәтти. Вәқә җүмә күни йүз бәргән. Хитай сүний һәмраһи аләм бошлиқини 18 күн айланғандин кейин йәр йүзигә қайтип келиватқанда техникилиқ кашила келип чиққан. Сүний һәмраһ сичүәнниң дайиң наһийиси фең ләйҗин базиридики аһалилар олтурушлуқ 4 қәвәтлик бир бинаниң үстигә чүшкән. Хитай мәтбуатлириниң хәвәр қилишичә, сүний һәмраһ бинаниң 4 - қәвитидики бир аилиликниң өгзисини тешивәткән, өй ичидики кариват қатарлиқ аилә сайманлирини вәйран қилған, бирақ вәқәдә өлүм - йетим һадисиси йүз бәрмигән.

Хәвәрләргә қариғанда өй игиси сүний һәмраһ чүшүп кетиштин 5 минут бурун бир иш билән талаға чиқип кәткән икән. Вәқәдин кейин һөкүмәт даирилири нәқ мәйданни дәрһал қамал қилған. Мутәхәссисләр нәқ мәйданға келип тәкшүрүш елип барған һәм сүний һәмраһ қалдуқлирини елип кәткән. Бирақ хитай мәтбуатлири сүний һәмраһниң немә үчүн аһалилар районға чүшүп кәткәнлики, қандақ кашила чиққанлиқи тоғрисида тохталмиди. Аһалилар райониға чүшүп кәткән сүний һәмраһ, хитайлар 1975 - йили тунҗи сүний һәмраһ қоюп бәргәндин бери йәр йүзигә қайтуруп кәлгән 20 - сүний һәмраһ болуп һесаблиниду. (Әркин)