Xitay sün'iy hemrahi sichü'endiki ahalilar rayonigha chüshüp ketti

Yer yüzige qaytip kéliwatqan xitay pen tetqiqat sün'iy hemrahi sichü'endiki bir ahalilar rayonigha chüshüp ketti. Weqe jüme küni yüz bergen. Xitay sün'iy hemrahi alem boshliqini 18 kün aylan'ghandin kéyin yer yüzige qaytip kéliwatqanda téxnikiliq kashila kélip chiqqan. Sün'iy hemrah sichüenning daying nahiyisi féng leyjin baziridiki ahalilar olturushluq 4 qewetlik bir binaning üstige chüshken. Xitay metbu'atlirining xewer qilishiche, sün'iy hemrah binaning 4 - qewitidiki bir a'ililikning ögzisini téshiwetken, öy ichidiki kariwat qatarliq a'ile saymanlirini weyran qilghan, biraq weqede ölüm - yétim hadisisi yüz bermigen.

Xewerlerge qarighanda öy igisi sün'iy hemrah chüshüp kétishtin 5 minut burun bir ish bilen talagha chiqip ketken iken. Weqedin kéyin hökümet da'iriliri neq meydanni derhal qamal qilghan. Mutexessisler neq meydan'gha kélip tekshürüsh élip barghan hem sün'iy hemrah qalduqlirini élip ketken. Biraq xitay metbu'atliri sün'iy hemrahning néme üchün ahalilar rayon'gha chüshüp ketkenliki, qandaq kashila chiqqanliqi toghrisida toxtalmidi. Ahalilar rayonigha chüshüp ketken sün'iy hemrah, xitaylar 1975 - yili tunji sün'iy hemrah qoyup bergendin béri yer yüzige qayturup kelgen 20 - sün'iy hemrah bolup hésablinidu. (Erkin)