Xitay hökümiti amérikining teywen'ge qoral sétip bérish pilanigha naraziliq bildürdi

Xitay hökümiti amérikining teywen'ge herbiy qorallarni sétip bérish pilanigha naraziliq bildürüp, amérika hökümitini mezkur pilanidin waz kéchishke we teywen bilen bolghan herbiy alaqini üzüshke qistidi.

Xitay tashqi ishlar ministirliqi bayanatchisi jyang yü, xitay terepning amérika hökümitining teywen'ge qoral sétip bérishige qattiq qarshi turidighanliqini bildürüp: "bu xitayning ichki ishlirigha qopalliq bilen arilashqanliq" dédi.

Aldinqi hepte amérika dölet mudapi'e ministirliqi teywen'ge p-3k owchi tipliq su'asti paraxotigha qarshi razwédka ayropilani we sim - 2 tipliq ayropilan'gha qarshi bashqurulidighan bombilarni öz ichige alghan 2.2 Milyard dollar qimmitidiki herbiy qoral-yaraqlarni sétip béridighanliqini uqturghan.

Amérika mudapi'e ministirliqi bixeterlik hemkarliq idarisi bayanatida: "bu qoral ‏- yaraq sétip bérish pilani, qoral ‏- yaraq sétiwalghuchi terepning ( teywenning) siyasiy muqimliqini hemde shu rayondiki herbiy we iqtisadi tereqqiyat tengpungluqini saqlishigha yardem béridu" dep otturigha qoyghan idi.

Xitay tashqi ishlar ministirliqi bayanatchisi amérikining mezkur pilani amérikining xitayning "bir döletlik ornini hörmet qilimiz", dep bergen wedisige xilap ikenlikini körsetken hemde amérikining bu pilanini derhal emeldin qaldurushni tekitligen. (Jüme)