Ma yingjyu, washin'gtonni ziyaret qilishni pilanlimaqta

22‏ - Mart küni teywende élip bérilghan prézidént saylimida, teywen prézidént wezipisige saylan'ghan ma yingjyu, washin'gtonni ziyaret qilish arzusi barliqini ipadilesh arqiliq, téxi prézidént wezipisini bashlimay turup amérika hökümitini, qéyin ehwalgha chüshürüp qoyghan. Chünki eger amérika hökümiti. Maning washin'gtonni ziyaret qilishigha ruxset qilsa, bu heriket xitay hökümitini ghezeplendürüp, amérika - xitay munasiwetlirige tesir yetküzüshi mumkin.

Fransiye agéntliqining xewer qilishiche, gerche amérika prézidénti bush, ma yingjyu teywen prézidénti bolup saylan'ghandin kéyin, uni tebrikligen tunji rehberlerning biri bolsimu, emma siyasiy mulahizichiler amérika hökümiti, xitay hökümiti tibettiki qozghilang tüpeylidin nahayiti jiddiy bir weziyette turuwatqan bir peytte, teywen prézidéntining washin'gtonni ziyaret qilishigha ruxset bérish arqiliq, xitay hökümitini ghezeplendürüshni xalimaydu, déyshmekte.

Ularning éytishiche, amérika tashqi ishlar ministirliqi mushu sewebtin ma ning amérikini ziyaret qilish telipige, éhtiyatchanliq bilen mu'amile qilmaqta iken.

Lékin,xewerlerge qarighanda, bezi amérika hökümet xadimliri, ma yingjyu, teywenning sabiq prézidénti chin shüybyenning siyasetlirini ret qilghanliqi üchün, amérika hökümiti uning washin'gtonni ziyaret qilip, amérikining aliy derijilik rehberliri bilen uchrishishigha ruxset qilishi kérek, déyshmekte.

Bu arida, teywen prézidént wezipisige saylan'ghan mayingjyu ikki qirghaq otturisidiki jiddiy weziyetni yumshitidighanliqini tekitlewatqan bir peyitte, seyshenbe küni, teywen mudapi'e ministirliqi, xitayning teywenni ishghal qilish éhtmalliqigha qarshi keng kölemlik bir herbiy manéwir ötküzidighanliqini jakarlidi. (Ömer qanat)