Teywende yüz minglighan kishi, teywenning b d t gha eza bolushini qollap namayish ötküzdi

Shenbe küni teywende yüzminglighan kishi, prézidént chin shüybiyenning, teywenni b d t gha eza qilish herikitini qollap, namayish ötküzdi.

Teywen démokratiye we tereqqiyat partiyisining bildürüshiche, teywenning jenubiy rayonigha jaylashqan gawsiyung shehiride ötküzülgen yighilishqa 5 yüz ming adem qatnashqan. Lékin saqchi da'irilirining xewer qilishiche, yighilishqa qatnashqanlarning sani 150 ming kishige yétidiken.

Teywen prézidénti chin shüybiyen, yighilishta qilghan sözide," biz teywen simi bilen b d t gha eza bolushni iltimas qilimiz hemde xelqining rayini sinash yeni rifrandom arqiliq xelq'ara jama'etke teywen xelqining iradisini körsitimiz" dédi. Sözide, xitay hökümitining teywenni xitayning bir qisimi dep qarawatqanliqini eskertken chin shüybiyen " biz héchqachan bundaq bir qarashni qobul qilmaymiz. Teywen igilik hoquqigha ige musteqil bir dölet" dédi.

Prézidént chin shüybiyen, xitay hökümitining qattiq qarshi turushigha we amérikining naraziliq ipadilirige qarimay, teywenning b d t gha eza bolushi mesilside prézidént saylimi bilen birla waqitta ray sinash élip bérish pilanini, choqum emelge ashurudighanliqini tekitlimekte.

Xitay hökümiti teywenning b d t gha eza bolushi toghrisida élip bérilidighan ray sinashni, teywen musteqilliqi yolida tashlan'ghan yene bir qedem dep qarimaqta. Amérika hökümiti bolsa, prézidént chin shüybiyenning bu herikiti, teywen boghuzidiki jiddiy weziyetni téximu keskinleshtüridu dep, körsetmekte.

Xewerlerge qarighanda, teywen bilen diplomatiye munasiwetlirini dawamlashturup kéliwatqan dunyadiki 24 döletning 15 y, teywenning b d t gha eza qobul qilinishi toghrisida, 18‏- séntebir küni ichilidighan b d t ning yilliq umumiy yighinigha teklip sun'ghan. (Ömer qanat)