Тәйвән б д т әзалиқи үчүн үзлүксиз тиришидиғанлиқини җакарлиди

Б д т омуми ишлар комитети чаршәнбә күни тәйвәнниң б д т ға әза болуш тәлипини бу нөвәтлик б д т омум йиғининиң музакирә күнтәртипигә киргүзүшни рәт қилғандин кейин, тәйвән боғузиниң икки қирғиқидики даириләр пәйшәнбә күни бу мәсилигә инкас қайтурди.

Тәйвән ташқи ишлар министирлиқиниң баянатчиси ваң җйәнйе, пәйшәнбә күни мухбирларға тәйвәнниң б д т ға әза болуш тәлипи бу қетим йәнә рәт қилинған болсиму, лекин тәйвән б д т ға әза болуш тиришичанлиқидин ваз кәчмәйду, дәп көрсәтти. Ваң җйәнйиниң әскәртишичә, тәйвән б д т ға әза болуш тәлипиниң оңушсизлиққа учриғанлиқидин әпсуслансиму, лекин бу вәқә дуня җамаәтчиликиниң диққитини қозғап, тәйвәнни дуняға намайән қилиш ролини ойниған.

Тәйвәнниң б д т ға әза болуш илтимаси чаршәнбә күни б д т омуми ишлар комитетида музакирә қилинғанда хитай билән мисирниң қарши чиқиши сәвәбидин, тәйвәнниң илтимасини б д т омум йиғининиң күнтәртипигә елиш рәт қилинди. Хитай ташқи ишлар министирлиқи пәйшәнбә күни баянат елан қилип,"б д т низамнамиси вә б д т омуми қурултийиниң 2753 -номурлуқ қарариға хилап һәр қандақ һәрикәт, б д т әзалириниң қоллишиға еришәлмәйду. Бир җуңго принсипиға бузғунчилиқ қилидиған, җуңгони парчилайдиған урунушлар әмәлгә ашмайду, дәп көрсәтти.

Бу тәйвәнниң б д т ға әза болуш илтимасиниң 15 - қетим рәт қилиниши болуп һесаблиниду. Тәйвәнниң сунған бу йилқи илтимаси, президент чен шүйбйән тәйвәнниң б д т ға җуңхуа минго, дегән нам билән әмәс, тәйвән, дегән исим билән киришни омум хәлқ авазиға қоймақчи болуватқан мәзгилгә тоғра кәлди. Бу хитай билән тәйвән арисидики сүркилишни җиддийләштүривәткән иди. (Әркин)